Election 2023: Hato don ne em ka lad ban ioh CM na Khasi-Jaintia?

Syllad | The Rising MeghalayaFebruary 28, 2022

Ka lyer naka bynta ka jingjied ia ki nongihkhmat sha ka iing dorbar thawain ka jylla, ka la sdang ia la ka jong ka baje ne katta ka countdown ka jong ka hangne hapoh ka jylla, ha kaba ki seng sain hima sima, ki kyrtong kiban iakhun lem bad ki paidbah ki la sdang ban ia khih ne ia krih na kawei ka seng sha kawei pat, kum shi bynta ka jingpynkhreh mih lympung, ban iakhun ia ka Election ban long ha u snem 2023 u ban wan.

Katba dang ia bunkam ka jingiapynkhreh, ka jingkylli kaba mih hi ruh ka long, ha ka election ha u snem u ban wan, la yn don ne em u kyrtong napdeng ka Khasi-Jaintia ban khreh ban ioh noh ban shong ha ka khet Chief Minister, kaba la bun bun tylli ki snem, kum ka jylla, la synshar ne la shong ha ane ka khet tang da ki nongmnih khmat ba dei napoh ka ri lum Garo.

Ban ioh ia ka jubab jong kane, shi ban, marsien ia khmih na ka jinglong jingman na ki seng sain hima sima, ka lama jong ka seng National People Party ne ka NPP, kaba lam khmat ia ka sorkar Meghalaya Democratic Alliance, ka lama ka jong ka ka khaweh bha, khamtam lei lei hadien jong ki lai tylli ki resol jong ki election shiteng samoi, ba la long ha u snem ba la dep.

Lyngba ka resol jong kine ki lai tylli ki election shiteng samoi, ba ka NPP ka la trei shitom bha bad arngut na ki kyrtong ki jong ka ki la wan shakhmat ban bat ia ka jingjop, hadien ba ki paidbah ki la ibit ban pynphong ia ka spong MLA na ka bynta ka samoi kaba dang sah.

Ha shwa ka jingpynlong ia kine ki lai tylli ki election shiteng samoi, ka lama jong ka seng NPP, shi por I kumba ka la sdang ba kan duh lyer bha, hadien ba ki seng sain hima sima ba don sha kawei pat ka liang, ki la sei lut phar ia ki kam barieh jong kane ka party, kum ka kam kynnoh tih bad khaii beain ia u dewiong, ka kynnoh jyrsieh bamsap ha ka tnat Meghalaya Electric Corporation Ltd, ka jingsah pongdeng ka tulop ban siew ia ki nonghikai, ka jingkynnoh donkti  jong ki dkhot kane ka seng ha ki kam thombor ia ki briew ba mih shakhmat ban pynpaw ia ki kam beian ka party bad kumta ter ter.

Pynban hadpeng ka jingshah pynap shrip na baroh  sawdong, bluit ka resol jong kine ki lai tylli ki constituency, kam lah ban khlem da pynkyndit ia baroh bad kane ka khana jong ka jingjop, ka tangon kylla pat ia kawei na ki seng kaba la rim bad kaba la suhthied bha ha kane ka jylla, katta ka seng Indian National Congress ne ka seng Congress.

Hadien kane, ka seng Congress ha kane ka jylla, ka la leit noh sha ka lynti ban jied ia u nongalam ba thymmai, ha kaba u MP ba mynta  ka Shillong Parliamentry u ma Vincent H. Pala, u la ioh ban bat ia ka kam nongialam jong ka Meghalaya Pradesh Congress Committee, ia kaba  ym slem hadien kane, 12 ngut na ki MLA ki jong ka, ki la rai ban ryngkang diengkper noh da kaba ki la pyniasnoh ialade sha ka seng All India Trinamool Congress, na ki 12 ngut kiba la mih noh na ka Congress, kiba sah pat ki long satang 5 ngut, ia kaba kine ki san ngut ruh, khlem da sngap shuh ia ka jingpyniaid jong ka All India Congress Committee nangtei na nongbah Delhi, hynrei ki la shim ia ka sien jam ban leit ban ai noh da ka shithi jingpynskhem ba ki la long noh kiba kloi ban  kyrshan noh shi syndon ia ka sorkar MDA, hapoh ka jingalam ka jong u Conrad K Sangma.

Kawei na ki kam ba radbah ba kane ka sorkar MDA ka la lah ba kan leh ka long ba kan shim haka ia ka jingkit khlieh ban sdang ban pyntylun noh shakhmat ia ka kam ban iakren bad pynbeit ia u pud u sam bad ka jylla Assam, ka kam kaba lehse naduh 50 tylli ki snem hadien ka jingioh ia la ka jong ka jylla ba pura, ki sorkar ki wan bad ki leit, hynrei wat tang jam ruh ka kam ia pynbeit ia u pud u sam kam shym la poi shano shano ruh, katba ki paidbah kiba im markhap bad ka Assam, ki im shisha ka jingim ba kordit bad shah pyndik ne dakhol ruh ki khyndew ka shyiap, ka jong ki.

Mynta lada yn ia phai sha ki shi snem jong ka jingpynkhreh ban leit sha ka election MLA ban long ha u snem u ban wan, ka jingiakhun kaban itynnad bha kan dei shwa napoh Ri Lum Garo, ha kaba u Conrad K. Sangma bad u Dr Mukul Sangma kin iakhun bad ksaid tyngeh bha hapdeng jong ki, ban khring  ia u paidbah ba ka snem kaban wan, ban bynshet khambun ki kyrtong nongjop na ka seng kaba la ialam da maki, nangta kine ki arngut ki nongialam, kin hap ruh ban phai lem ki khmat sha ka Ri lum Khasi-Jaintia ban ioh lem ia ka number kaba ki donkam ban ioh ban lamkhmat ha ka liang ban thaw biang ia ka sorkar ha kane ka jylla.

Shisien pyrkhat, ka jingiakhun ba shyrkhei ha ri lum Garo, kan dei ka kabu ksiar ia u paidbah ka ri lum Khasi Jaintia, ba lada um iapait ne pra, ka shuki Chief Minister mynta ka kynti, ka plie lad bha ban ioh da u briew lajong, da kaba u paidbah hi nangne un hap ban shim lypa ia ka rai kut nangne shakhmat iano u dem shisha ka mon ban pynjop kham bun, la ia ka NPP, UDP, hynrei na ka bynta ka seng Congress, na ka daw ka jingpait bad pra noh ka iing ka sem ka jong ka, u ma Vincent Pala bad ka kynhun baroh kawei jong ka MPCC, sa shisien kin hap ban sdang biang naduh kaba sdang, namar ki 5 ngut ki MLA ba mynta kiba la rai ban kyrshan noh ia ka sorkar MDA, la I artatien bha ia ki ba kin iakhun na kane ka party ha ka election kaban wan.

Nangta kiwei pat ki seng kum ka BJP, HSPDP, PDF kiba ia synrop lang naduh kaba sdang bad ka sokar MDA, kine ruh kin don hi ia la ka jong ka kamram ban pynpaw ha ka election aban wan, hynrei kumba ka long ia mynta bad na ki dak ki shin kumba ki mih paw hi, ki MLA NPP ka ri lum Khasi-Jaintia, kumba ka long ia mynta, kaei kaba ki shem bad iohi hi ka long ba ka lawa naka bynta ka jong ki ka iai khaweh, tang sa shi snem ka lynti ban iaid, da lei lei kin nym dei ban khein sting, kin ha ban iai trei shitom, bad ruh ban khmih bniah bhai a la ka jong ka lieng, ioh don pynban u suri kup snieh langbrot, uba napoh napoh un ksam noh da u prek ban pynpei thliew  ia kane ka lieng, kaba kat ban da poi ka samoi jong ka jingiakhun kaba shisha ia ka election, ka lap ba ngam jyllop noh ha shiteng jong ka lynti iaid ka jong ka.