Elekshon MDC: Ki paidbah ki dei ban vote da kaba pynshong nongrim ia ka roi ka par, ong u Kyrmen

Syllad | The Rising MeghalayaNovember 7, 2024

U Nongialam ka UDP uba dei ruh u Myntri Sorkar u Bah Kyrmen Shylla ha ka 6 tarik u Naiwieng ula ong ba ki paidbah ki dei ban thep vote da kaba pynshong nongrim halor ka roi ka par bad ki jingkular ba la pynurlong ym ia ka ktien jali jaum ha kane ka elekshon ban wan sha ki artylli ki Autonomous District Council ha Rilum Khasi bad Jaintia ka ban sa long ha u snem u ban wan.

“Nga kyntu ia ki paidbah ka Jylla ba ha kane ka kynti kaba mynta wat ym pynsngap shuh tang ia ki ktien jali jaum hynrei ban khmih ruh ia ka roi ka par bad ki jingkular kiba ki la pynurlong (hashwa ban thep vote ha ka elekshon MDC),” ong u Bah Kyrmen haba kren sha ki lad pathai khubor.

U la ong ruh, “Ha ka jingshisha ka dei ka jingkyrkhu ban don hapoh ka Sorkar.Ngi la ioh ia ka lad ban wanrah ia ka roi ka par sha ki paidbah. Hynrei, lada phi don shabar ka Sorkar phin ym ioh ia ki kam pynroi ha ki constituency ki jong phi bad phin ym lah ban aijingshakri hok sha ki paidbah namar ym don ba jied ia phi ban shong ha ka liang pyrshah.”

“Ki paidbah ki kwah ban iohi ia phi ha ka liang synshar bad kane ka dei ka jingkhmih lynti ka jong ki. Ym don satia ki nongthep vote kiba khmih lynti ia ki MLA/MDC ban shong ha ka liang pyrshah” ula bynrap.

U Bah Kyrmen ula ong ruh ba ka UDP mynta ka la pynkhreh shaid shaid ia ka elekshon MDC. Ula iathuh ba ka party kala ailad laitluid ia ki nongialam jong ka Constituency jong u ba kin jied ia u kyrtong napoh ka constituency jong u.

Nalor kata u la ong ruh ba baroh ki MDC ba mynta kin dei ki kyrtong jong ka party ha kane ka elekshon MDC ka ban wan.