Elekshon MDC: Pynbna ka NPP iaki 18 ngut ki kyrtong sha ka KHADC bad 20 sha JHADC

Syllad | The Rising MeghalayaDecember 6, 2024

Ka National People’s Party (NPP) kaba synshar ia ka Jylla ha ka 6 tarik Nohprah ka la pynbna ia ka thup kyrteng kaba nyngkong jong ki 18 ngut ki kyrtong ki ban mih ia aireng ha kane ka elekshon Autonomous District Council (ADC) ka ban long ha u snem u ban wan na Rilum Khasi bad 20 ngut na Rilum Jaintia.

Ia kane ka thup jong ki kyrtong la pyllait paidbah da u Working President ka NPP Meghalaya State Unit u Bah Hamletson Dohling ha ka jingiadon lang u nongaiktien ka NPP u Bah Himalaya M Shangpliang nalor kiwei pat ki nongialam.

Katkum kane ka thup kyrteng na ka bynta ka KHADC ki 9 ngut ki dei ki MDC ba mynta kiba kynthup ia u Chief Executive Member (CEM) u Bah Pyniaid Sing Syiem uba mihkhmat ia ka Sohryngkham bad u ban ia aireng mynta na 16-Nongthymmai constituency bad u Chairman jong ka Council u Bah Lamphrang Blah.

Kiwei pat ki MDC ba mynta ki kynthup ia ka Kong Grace Mary Kharpuri na Nongskhen, Kong Macdalyne S Mawlong na Umsning, Bah Rangkynsai Kharbuki na Umroi, Bah Alvin K Sawkmie na Mawsynram, Bah Fantin J Lakadong na Laitumkhrah-Malki, Bah Lamphrang Blah na Mawphlang-Diengiei, Bah Batskhem Ryntathiang na Mairang-Nongkhlaw bad u Bah Carnes Sohshang na Mawkyrwat.

U MLA barim ka Rambrai-Jyrngam u Bah Kimfa S Marbaniang un ia aireng na Rambrai-Jyrngam, kata ha ka jaka jong u MDC ba mynta u Bah Bajop Pyngrope.

KI arngut ki MDC barim kiba la ioh tiket ki kynthup ia u Bah Donevan Kharwanlang na Sohra bad ka Kong Rona Khymdeit na Nongpoh constituency.

Na ka bynta ka JHADC ka NPP ka la pynbna ia ki kyrtong jong ki 20 tylli ki constituency  bad kine ki kynthup ia 12 ngut ki MDC ba mynta, kata kynthup ruh ia u Chief Executive Member (CEM) u Bah Thombor Shiwat bad u Chairman u Bah Shankey Shangpung.

Kiwei pat ki MDC ba mynta ki kynthup ia u Bah Holando Lamin na War Central, Bah Het Pohthmi na War West, Bah Lakhon Dkhar na Amwi Khliehtyrshi, Bah Ailad Bhoi na Mukhla Ummulong, Bah Jesse Suiam na Moodymmai Nongkhroh, Bah Eneningstar Teron na Mynso Nongjngi, Bah Rudaioo Tang na Shilliang Myntang, Bah Aiborlang Shadap na Barato Mukroh, Bah Phasmon Dkhar na Musniang Rngad bad u Bah Hambertus Nongtdu na Sutnga-Nongkhlieh.