Elekshon MDC: Shen yn pynbna ka Congress ia ka thup kyrteng kaba ar jong ki kyrtong

Syllad | The Rising MeghalayaDecember 26, 2024

Ka liang pyrshah Congress shen kan sa pynbna ia ka thup kyrteng kaba ar jong ki kyrtong ki ban mih ia aireng ha kane ka elekshon sha ki artylli ki Autonomous District Councils (ADCs) na Khasi bad Jaintia Hills ka ban long ha ka 21 tarik u Rymphang 2025.

“Ngin sa pynbna shen ia ki kyrteng jong ki kyrtong na ka bynta ki constituency kiba dang sah,” ong u Working President ka Congress uba dei ruh u MDC ba mynta u Bah Pynshngain N Syiem.

Ha ka 19 tarik Nohprah ka Congress ka la dep ban pyllait ia ka thup kyrteng kaba nyngkong jong ki 26 ngut ki kyrtong ki ban ia aireng ha kane ka elekshon sha ki ADC, kata 15 ngut ki ban iakhun na Khasi Hills bad 11 ngut na Jaintia Hills.

Ia kane ka jingjied la pynlong hadien ka jingjurip kaba bniah ha ka jingiadon bynta lang ka Block Congress Committee (BCC), District Congress Committees (DSC), bad ka Pradesh Election Committee (PEC), ong u kyrwoh ka seng Congress.

“Kine ki kyrtong ba la jied ki kynthup ruh ia ki durkhmat kiba thymmai, ki riew shemphang bad ki riew shimet kiba la shah hikai pyntbit ban shakri hok ha ki kam jong ki. Kane ka jingpynkhreh ka pynpaw ia ka jingkut jingmut bad ka jingangnud jong ka seng Congress ban wanrah ia ki nongialam kiba tbit bad ba shlur, kiba aiti lut na ka bynta ka bha ka miat bad ki jingangnud jong ki paidbah ka Jylla Meghalaya,” ong u kyrwoh ka party da kaba bynrap, “Katba ngi nang jan sha ka elekshon, ngi kyrpad ia ki paidbah nongthep vote ka Ri Khasi bad Jaintia ban ai ka jingshaniah ha ka seng Congress bad ki kyrtong jong ngi.Ka Seng kan dang iai bteng ban iada ia ki kyndon jong ka Sixth Schedule bad ban pynneh pynsah ia ka hok bad ki jingmyntoi jong ki jaidbynriew riewlum.”

“Ngei ngeit ba ki paidbah ka Meghalaya kin ai ka rai kaba shai sha ka Congress, kaba pynlah ia ngi ba ngin bteng ia ka thong ka jong ngi ban kiew shaphrang ha ka roi ka par bad ban pynioh ia ka hok sha baroh.” Ryngkat lang, to ngin pynkhlain ia ka synshar paidbah bad trei na ka bynta ka lawei kaba phyrnai jong ka Meghalaya”, ka la bynrap.

Ki 15 ngut ki kyrtong ki ban iakhun na ka bynta ka elekshon sha ka KHADC ki kynthup ia u Bah Dominic Mynsong-Mawhati, Rocky A Marwein-Umsning, Jonathan Syiem-Sohryngkham, Hilarius Warbah-Mawkynrew, Astarland Khyllep-Shella, Banphiralang Basaiawmoit-Mylliem, Alan Kharkongor-Nongthymmai, Manuel Badwar-Laitumkhrah-Malki, Pynshngainlang Syiem-Mawkhar-Pynthorumkhrah, Gerald Shullai-Jaiaw-Mawprem, Wanseng Jyrwa-Mawlai, Nathaniel Rymmai- Nongspung-Sohiong, Lawanpynshngain War-Mairang-Nongkhlaw, Bormanding Nonglang-Rambrai Jyrngam bad u Bah Medal Sing Lyngdoh-Mawkyrwat.

Katba ki 11 ngut ki kyrtong sha ka JHADC ki long u Romeo Lyngdoh-War Central, Madonbai Rymbai-Amwi-Khliehtyrchi, Jona Rynjah-Moodymmai-Nongkhroh, Pyrkhatbha Pyrphet-Mynsngat-Khanduli, Banikas Laban-Barato-Mukroh, Rikut Parien-Saphai-Sahsniang, Welpard Suchiang-Raliang, J Treilang Suchiang-Shangpung, Yooniki Phawa-Muthlong Sohkynphor, Siril Suja-Sutnga Nongkhlieh bad u Grimlang Dkhar na Narpuh.