U Emlang Laloo u kyrtong Congress na Nartiang

Syllad | The Rising MeghalayaMay 26, 2022

U President ka Meghalaya Pradesh Congress Committee uba long ruh u MP Lok Sabha u Ma Vincent H Pala haka sngi Balang ula wan pynskhem bad pynbna paidbah ba Ma Emlang Laloo u dei u kyrtong ka party Congress na 1-Nartiang Assembly Constituency sha ka Election MLA 2023 ka Jylla.

Ia kane ula pynbna paidbah haka jingialang pynrung dkhot ka Nartiang Block Congress Committee ha Missio Community Hall Namdong. Iaka jingialanbg la pyniaid da u Ma Elias Susngi President Nartiang Block Congress Committee haka jingiadonlang ki nongialam ka District Congress Committee, West Jaintia Hills kiba kynthup ia u Rikut N Parien general secretary, vice president MPCC Nehemayah Tyngkan uba dei ruh u kyrtong na Mowkaiaw, MDC Mawhati Constituency u Bah Charles Marngar nalor kiwei kiwei.

Ha kane ka juh ka sngi ka la pynrung dkhot ruh ia ki katto katne kiba la iehnoh iaka National Peoples’ Party (NPP), Bharatiya Janata Party (BJP) bad United Democratic Party (UDP) na katei ka thain.

U Ma Vincent ula ong ba Congress kan iakhun na baroh 60 Constituency bad baroh kyrtong kidei kiba la biang ka jingnang jingstad bad kiba la biang ka kyrdan kynthup naduh ki doctor, engineer, lawyer, Scientist bad kiwei kiwei.

U Ma Vincent ula pan jingkyrshan ruh na u paidbah ka thain ban kyrshan ia u Emlang namar udei u briew uba la biang ka jingnang jingstad bad ula kyntu ruh ïaki paidbah ba kim dei ban shah pynbieij haka pisa haki por election.

U Ma Emlang Laloo u dei uba na ka shnong Saitsama, udei u ophisar ba bat ïaka kyrdan Joint Director ka tnad Soil & Water Conservation ka sorkar jylla. Une u rangbah ula shim daka Voluntary Retirement Scheme ban mih madan haka election 2023.

Ula ïathuh ba ka daw kaba kongsan kaba pynlong ïa u ban ïaleh ïa kane ka election 2023 kadei ban ïarap bad kyntiew ïaka ïoh ka kot jong ki nongrep hapoh ka 1-Nartiang Constituency bad ban wanrah iaka roi ka par kaba salonsar.