Four lane: Jurip u MP Shillong ryngkat ka bor District Ri Bhoi bad NHIDCL ia ka tyllong um ha Umroi Madan

Syllad | The Rising MeghalayaSeptember 5, 2024

U MP ka Shillong u Dr. Ricky AJ Syngkon, ki ophisar na ka ophis u Deputy Commissioner, Ribhoi District lem bad ki heh na ka National Highway & Infrastructure Development Corporation Ltd (NHIDCL) bad ki nongshong shnong Umroi Madan ha ka 4 tarik Nailur ki la leit ban jurip ïaka tyllong umbam umdih jong ka shnong Umroi Madan kaba don ha ki bynta jong ki lum jong ka shnong Umroi Madan, ka jaka ia kaba la thmu ban pyniaid ia ka surok 4 lane.

Lah ban kdew hadien ba sorkar ka thmu ban pynïaid ïa ka surok 4 lane Umïam-Malidor na u lum ka shnong Umroi Madan kaba don iaka tyllong um kala mih ka jingpyrshah na ki katto katne ngut ki riew rangbah halor katei ka jingthmu ba ïoh kan ktah ïaka tyllong umbam umdih kaba bsa ïa baroh ki nongshong shnong.

U MP ka Shillong u Dr. Ricky AJ Syngkon ula hiar dalade sha katei ka jaka khnang ba un ïohi hi da la ki khmat halor ki jingud jingnam jong ki paidbah ka thain.

U MP u la kyntu ïa katei ka company NHIDCL kaba pyntrei ïa kane ka 4 lane ba kin da bishar bniah bha ha shwa ban pynïaid iaka surok na u lum ba kan ym don kano kano ka jingktah ïa katei ka tyllong umbam umdih bad kumjuh ruh khnang ba kan ym ktah ïa kiwei kiwei ruh ki jingdon jingem jong ki paidbah.

Ki nongshong shnong ki ba la ia donlang ha katei ka jaka ki la pynpaw ba kim don satia kano kano ka jingthmu ban pyrshah ïaka jingwan jong ka surok 4 lane kaba lah ban pynlong pynban ïa ka jingnangkiew haka roi ka par, hynrei ki pynpaw iaka jingsyier da ka jingwan katei ka kam pynroi ïoh kan ktah pynban ïa katei ka tyllong um kaba ki pyndonkam baroh shirta ha kaba ki la kyrpad ruh kin ym pat pyntrei ïa katei ka kam katba kim pat lah ban pynthikna la kan ktah ne em ïa katei ka tyllong um.

Ki ophisar kiba la wan na ka liang ka ophis U Deputy Commissioner ka Ri Bhoi bad na ka NHIDCL ki la pynsngew ba ka jingpynïaid ïa katei ka surok 4 lane (Umiam-Malidor) na katei ka jaka lum jong ka shnong Umroi Madan ka dei hi hadien ba la dep ban leh ïa ka Survey bad la lap ba lada pynïaid na utei u lum ka iadei bad ka jinglong jingman ka surok, katkum ka jingdonkam jong ka katei ka Project.

La pynsngew ruh ba lada iaid ka 4 lane na u ranab lum jong Umroi madan kan ktah iaka tyllong umbam umdih la kumno kumno shisnem lane shi snem tam, hynrei na ka liang jong ki ophisar kin sa pynsngew sha u DC, Ri Bhoi ha kaba un sa khot ïaka jingïalang bad ki ophisar ka NHIDCL lem bad katto katne ki tnad jong ka sorkar ba dei peit ïa katei ka bynta ban ïa kren kham bniah halor kane ka kam.