Gambegre bye-election: Hadien ka 21 tarik yn pynbna kyrtong ka BJP 

Syllad | The Rising MeghalayaOctober 17, 2024

U nongialam ka BJP uba dei ruh u Myntri Sorkar, u Bah AL Hek ha ka 17 tarik u Risaw u pyntip ba ka party shen kan sa pynbna noh ia u kyrtong ban iakhun ha ka elekshon shiteng samoi ha Gambegre hadien ka jingialang bad ki nongialam ba halor ha ka ban long ha ka 21 tarik  mynta u bnai.

Haba kren sha ki lad pathai khubor, u Bah Hek u la ong ba ka party kan mih ban iakhun ha kane ka elekshon ha Gambegre da kaba ong ruh ba ki don beit ar lai ngut kiba pan tiket na ka party.

 “Hadien ba ki la aplai, ka party kan sa shim ia ka rai kaba biang tam iano ban ai ia ka tiket. Kumjuh ngin sa leit sha ka jingialang ha Delhi ha ka 21 tarik u Risaw. Ngi la pynlong ruh ia ka jingiamir jingmut lyngba ki kor internet bad ki nongialam na ka bynta ban pynieng kyrteng ha kane ka elekshon shiteng samoi,” u la ong.

U Bah Hek u la ong ba ka party kan sa rai khatduh ha kaba iadei bad u kyrtong tad hadien kane ka jingialang bad ki nongialam ba halor ha Delhi.

 “Nga kubur ia kaei kaba phi ong ba ka BJP ka la pynbna slem ia u kyrtong jong ka. Mynta ka kynti ki la khot ia ngi ban iamir jingmut lang, kumta ngin iakren bad tad hadien kata ngin sa rai khatduh ia u kyrtong na ka bynta kane ka elekshon shiteng samoi ha Gambegre,” u la bynrap.

Haba kylli, une u nongialam ka BJP u la ong, “Peit ki kam pynroi ka dei ka thong ba kongsan jong ka Sorkar NDA ba la ialam da u Myntri Rangbahduh Narendra Modi. Ki don shibun ki skhim ba la ai sha kiba duk tam na kiba duk.Ki don shibun ki bah ki kam pynroi ba la lah ban pyndep da ka Sorkar Pdeng.Kata ka dei ka thong ka jong ngi. Hynrei ka shong ha ka mon jong ki paidbah.”

Halor ki jingkynnoh jong ka BJP na Rilum Garo pyrshah ia ka NPP, u Bah Hek watla katta u la ong, “Kane ka dei ka sorkar MDA. Ngi dei ka bynta jong ka sorkar MDA. Ki paidbah ki don la ki jong ki jingpynsngew. La phi pdiang ne phim pdiang ia ki jingsngew jong ki ka shong ha u briew shimet hynrei ka dei ka jingpynsngew jong ki paidbah.