Ha Eugeneson Lyngdoh bynshet ka Shillong Sports Association ïa ka kam President

Syllad | The Rising MeghalayaDecember 18, 2021

Hadien ka jingkhlad noh kaba shu syndet jong u bah SK Sun (Bahdeng), ba dei artad u MLA ka Mawphlang Constituency, ka Shillong Sports Association, ka la bynshet pat ha u khun u jong u, ba la jop ruh ia ka elekshon shiteng samoi na kane ka constituency, u bah Eugeneson Lyngdoh MLA ba mynta ka Mawphlang Constituency ban shimti ia kane ka kam, kaba u kpa jong u, ula bat ha kane ka synjuk ha u snem 2018-2021

Kane ka jingshimti u bah Eugeneson ia ka kam President jong ka SSA, ka la wan ha ka jingialang jong ka Special Annual General Meeting, kaba la long ha kamra shong jingialang jong ka SSA Stadium, Polo, ha kaba ki dkhot ba la poi sha kane ka jingalang da kawei ka sur, ki la rai ban shu bynshet beit beit ha u Eugeneson ia kane ka kam.

Haba batai sani bha halor kane ka jingjied ia u bah Eugeneson, u Hony Secretary ka SSA u Bah SS Rapthap, u iathuh ba mynta ka sngi, ka synjuk ka la lum kyrpang ia kane ka jingialang, kaba ia kum kine ki jait jingialang la khot kyrpang lada jia ba mih kino ma kino ki kam kiba long kyrkieh kaba long kat kum ka riti treikam (constitution) jong ka SSA.

Kumta ha kane ka sngi, ka SSA kam banse ba kan khot ia kane ka jingialang, hadien ba ka la dep ba kan duh ia la u nongialam u Bah SK Sun, kaba hadien kane ka jingkhlad, ka SSA ha kaba nyngkong ka la shu thung shipor ia uwei na ki vice president ban long kum u nongialam ba shipor ba tip kum u ‘interim president’, hadien kane, ka SSA kan sa hap ba kan lum ia ka jingialang ba kyrpang’special AGM’ ban jied bad ban ioh ban pynskhem ia u President.

“Ngi sngewtynnad shibun eh, ba u Bah Eugeneson Lyngdoh, khun jong (L) SK Sun u la long uba kloi ban shim ia ka kam kum u nongialam jong ka SSA” la iathuh u bah Rapthap.

Lehse yn nym da donkam shuh ban batai shaphang u bah Eugeneson, uba dei uwei na ki khlur ialehkai phutbol uba la paw bad tyngshain ba la ioh ban mihkhmat ia la ka jong ka ri bad ruh ba la shah soi ruh ha ki klob ialehkai bna nam ka ri, kum ka Shillong Lajong FC, Bengaluru FC, East Bengal bad kumta ter ter.

Haba kren hadien ba la wai jong kane ka jingialang ha madan First Ground u bah Eugeneson u dap da ka mynsiem kaba kmen eh ia ka SSA, kaba la khot bad pdiang ia u ban long kum u nongialam u jong ka.

“Nga sngewkmen eh ba ngan ioh ba ngan iadon bynta ha kum kane ka liang, namar naduh mymba ba nga dang rit, nga la don shibun ki jingiadei, jingkynmaw ba iadei bad ka SSA, naduh dang rit nga la wan ba ngan peit kai ia ka lympung Shillong League naduh ka por ba dang ialehkai I Pa (SK Sun), I Mama bah Kar Kurbah, nangta ki jong u bah Freddy ba dei u dkhot Shaiwol, bad kum u khynnah nga la heh nga la san bad ka mynsiem jong nga naka bynta ka phutbol ruh ka la sdang nangne” la ong u bah Eugeneson.

Nalor katta u Eugeneson u ong ba dei lyngba ka SSA kaba la plie ia ka lad bad ka jingdon ka jong ka, ka long kaba btin lynti ia kiba bun ki nongialehkai phutbol ba la mih na kane ka lympung ialehkai, kaba um lah ban jer kyrteng lut hangne.

“Nga ruh kumjuh nga long kumba nga long ka dei ba dei lyngba ka SSA bad ka jingioh ban ialehkai ka jong nga ha kane ka Shillong Premier League” la ong u bah Eugeneson.

Hadien ba la shah jied ban long kum u nongialam ba thymmai bad ba khynnah tam ha ka khana pateng jong ka SSA, u bah Eugeneson u kah ban ong ba kum ka synjuk, ne ka SSA Team kaba nangne shakhmat ban nang iai trei shitom, namar ka kam ialehkai kam dei shuh ka kam pynbyrnia ne ban shu kilan im sngi ia la ka jong ka met, hynrei mynta ka kam ialehkai ka dei ka lad kamai ne ka profession bad katno eh ba na ka liang ki nongkit kam ka SSA, lada ki lah ban dang iai btin lynti ia kiwei kiwei ki khynnah ka jylla ban plie ia ka lad ka lynti, ka rynsan kaba dei nak a bynta ki jingialehkai bapher bapher kaba ka SSA ka peit.

“Ngi kwah ban trei lang kum ka kynhun ban gin lah ban plie ia ka rynsan ia ki khun samla ba kin pyni ia la ki sap ki phong ban pyntbit ne ban pynbiang ia ki, khnang ba maki ruh hadien kin lah ban wanrah ia ka nam ka burom ia ka jylla bad kum ki nongkitkam ka synjuk, kin da dap da ka jingsngewkmen ba la lah ban ialam bad ban btin lynti ia ki khun samla bad ban ai ha ki ia ka lawei kaba phyrnai” ong u bah Eugeneson.