Ha Iawmusiang Jowai wan poi ka syiar khlaw

Syllad | The Rising MeghalayaNovember 1, 2024

U Bah Jarman Lamare u nongshong shnong jong ka shnong Moosakhia uba don dukan ha Iawmusiang, haka 1 tarik Naiwieng ula aiti sha ka tnad Wild Life, West Jaintia Hill District ia kawei ka sim khlaw kaba tip kum ka syiar khlaw (Pheasant).

Kaba phylla ka long kat ka jingbun briew ha iew katei ka syiar khlaw ka wan sha iew Iawmusiang, kaba bunsien ki wad bam haka por mynmiet.

U Bah Lamare u la iathuh ba u la iohi ba katei ka syiar ha kaba sdang ka la shongthait ha u wire nangta ka la hap bad ryngkat bad ki paralok jong u ki la kem ia ka.

Katkum ka jingïathuh jong ka Melanie Passah Project Manager Foundation for Ecological Security (FES), ka la ong ba kane ka sim ka long kum ka Kalij Phesant kynthei ba lah ban shem ha ka thaiñ NE jong ka Ri India.

U Bah Lamare uba dei ruh u tymmen basan jong ka Balang Presbyterian, Moosakhia u la ong ba ka long kaba donbok ba u la ioh kem ia katei ka sim lym kumta ki briew ki la pynkhreh ban shoh doh.