Ha ïing dorbar yn ïakren halor ka thungkam beaiñ ha JHADC: BJP

Syllad | The Rising MeghalayaNovember 7, 2019

JOWAI: Ki Saw ngut ki MDC BJP kila rai ban iakren bad ban pan jingshai na ka Executive Committee (EC) jong ka Jaiñtia Hills Autonomous District Council (JHADC) halor ka jingthung kam beaiñ hapoh ka konsil ha ka dorbar tlang kaban long haka 28 tarik une u bnai.

Nalor kane ka mat ki MDC jong ka BJP kila rai ruh ban pan jingshai halor ka jingsahteng ka jingpyntrei ïaka Iawmusiang kaba thymmai, ka Jaiñtia Dorbar Hall bad ka jingduh tulop jong ki nongtrei ka konsil.

Kine ki saw ngut ki MDC BJP kiba kynthup ïa u Lakhon Biam, Dawan Lyngdoh, Krison Langstang bad u J Treilang Suchiang kila ïathuh ïa kane ka jingïakren bad ki nongthoh khubor ha conference hall jong ka Infinity Restaurant haka sngi Palei.

U Ma Lakhon Biam ula ong ba ka Executive Committee kaba ïalam u Thombor Shiwat kala dep thung ïaka jingtohkit halor ka jingkynnoh thung kam beaiñ hapoh ka konsil ïaki 56 ngut ki nongtrei ka konsil, hynrei haduh mynta kam shym la mih kaiphod kaba la dei ban mih naduh u bnai Jymmang 2019.

Kine ki MDC BJP kila pynpaw ruh ka jingbynniaw halor ka jingbym lah ka EC ban pynïoh tulop ïaki nongtrei ka konsil manla u bnai, khamtam mynta bala jan poi ka aiom lehkmen Christmas bad ka jingrakhe ïa u snem ba thymmai.

U J Treilang Suchiang u angnud ba kane ka dorbar tlang kan neh haduh  2-3 sngi khnang ban kin ïoh iatai sani bha halor kine ki mat bad u bynniaw halor ka rukom shong dorbar ka konsil ba bunsien kam don ka jingiatai namar ba ka dorbar bunsien ka kut tang hapoh shisngi.