Ha Jowai yn pynlong ia ka Meghalaya Games kaba hynriew ha u 2025

Syllad | The Rising MeghalayaJanuary 20, 2024

Ka Jowai, West Jaintia Hills District kan long sa kawei pat ka jaka kaba ka sharak jong ka Meghalaya Games kan iuhkjat ha u snem 2025, kaba mut ba kane ka sorbah kaba la rim tam ha ka Jylla kan khreh ha ka ban pynlong ia ka Meghalaya Games kaba hynriew ha Jowai.

La pynbna ia kane ha ka jingialang ban pynhap pyrda ia ka Meghalaya Games kaba san ha PA Sangma Stadium kaba ha Tura haka 20 tarik Kyllalyngkot.

Ha kane ka kynti baroh ki don haduh 23 tylli ki jait jingialehkai ba la pynlong ha Tura, West Garo Hills District, ka East Khasi Hills District ka la long ka lahduh ha kane ka lympung hadien ba kala ioh ban kan khur haduh 359 tylli ki takma kata 132 tylli ki takma ksiar, 105 tylli ki takma rupa bad 122 tylli ki takma rnong.

Ka District kaba wan ba-ar ha ka miej ioh khur takma dei ka Ri Bhoi District kaba la ioh ba kan khur 79 tylli ki takma ba kynthup ia 27 tylli ki takma ksiar, 22 tylli ki takma rupa bad 30 tylli ki takma rnong.

Ka West Jaintia Hills District ka la wan ha ka kyrdan balai hadien ba ka la khur 68 tylli ki takma, kynthup ia 25 tylli ki takma ksiar, 18 tylli ki takma rupa bad 25 tylli ki takma rnong.

Ka West Garo Hills kaba long ka district kaba la pdiang ban pynlong ia kane ka lympung ka la ioh ba kan khur 73 tylli ki takma, kata 17 tylli ki takma ksiar, 17 tylli ki takma rupa bad 39 tylli ki takma rnong.