Ha Jowai yn pynlong iaka iakop rahnar, wer iashimbynta ka MWA

Syllad | The Rising MeghalayaSeptember 14, 2024

Shibynta ka jingpynkhreh iaka 6th Meghalaya Games 2025 ka ban long ha Jowai bad Wahiajer, ka Meghalaya Weightlifting Association (MWA) ryngkat ka jingiatreilang ka ophis jong u District Sports Officer (DSO), West Jaintia Hills kin pynlong da ka jingïakop rah nar kaba shisngi na ka bynta ki shynrang bad kynthei kaba tip kum ka “2nd Meghalaya State Weightlifting Championship”.

Kane ka jingiakop kan long ha iungwalieh ka Dorbar Shnong Tpeppale, Jowai haka 26 tarik Risaw.

Ki nongialam ka MWA kynthup ia u President Donald Rymbai, Joint Secretary Anthony Kharnaior haka 14 tarik Nailur, kila pyntip ba kane ka jingiakop yn pynlong haka 26 tarik Risaw ha iungwalieh ka Dorbar Shnong Tpeppale na ka bynta ban pynkhreh iaka Meghalaya Games 2025.

“Kane ka jingiakop ka long na bynta ban sei madan ïaki khynnah ka thain rilum Jaintia kiba don ka sap bad ka bor ban rahnar ban iashim bynta haka Meghalaya Games 2025,” la ong u Bah Donald.

Kine ki nongïalam ka MWA kila wer iaki khynnah bad samla ka rilum Jaintia khamtam ki khynnah na ka sor Jowai ban wan iashimbynta sha kane ka jingiakop kaba paw bha haka Olympic games bad Asian Games.

U Khroobok Passah, DSO West Jaintia Hills ha ka thong ban kyntiew ia kane ka jait ialehkai hapoh ka rilum Jaintia u la khot bad wer kyrpang iaki khun samla shynrang bad kynthei ba kin wan mihkhmat bad shim ia kane ka kabu ksiar.

Shuh shuh kine ki nongialam, kila pyntip ruh ba haka 25 tarik Risaw ka MWA kan pynlong iaka coaching bad kino kino ki khynnah kiba kwah ban iashim bynta ha kane ka jingiakop ki lah ban wan sha kane ka jinghikai naduh ka por 4.00 baje haduh 6.00 baje janmiet ha Iungwalieh Tpeppale.

Iaki jingtip kiba kham bniah lah ban phone ha kine ki number 8729992091/ 8730837484.