Ha ka kyrdan ba 6 ka miej khur takma bat ka Meghalaya, ka Manipur ha khliehduh haka North East Games

Syllad | The Rising MeghalayaMarch 23, 2024

Tad haduh ba la kut jong baroh ki jingialehkai ka sngi kaba saw ka lympung ialehkai jong ka  North East Games ha Nagaland, ka long ba ki rang bad ki thei ialehkai ka ri, ki la ioh ban khur bun tylli ki takma rnong, na ki kato katne tylli ki jingialehkai haka 22 tarik Lber.

Hynrei ka khubor kaba kham pynsngewtynnad ka la wan na ka kynhun ki thei ialehkai basketball, kiba la lah ba kin jam sha ka phainal jong kane ka lympung, kaba la wan hadien ba ki la lah ba kin pynliem noh ia ka Nagaland da 60-45 ha ka jingiakhun iaka semifinals.

Lada phai sha kiwei pat ki resol jong ki jingiakob haka sngi kaba saw jong kane ka lympung, haba phai shaka iakob siat khnam ne Archery, ka kynhun ki rang ialehkai ka jylla ki la ioh ba kin khur ia ka takma rnong hadien ba ki la lah ba kin pynliem ia ka kynhun ialehkai jong ka Sikkim da 210-207.

Ha kane ka kynti, ia ka Meghalya la mih madan da u Phermiki Salahe, Leonaldo Lyngdoh, Enisaiborson Lyngdoh bad u Sumit Kumar Choudhury.

Lada phai pat sha ka boxing, kan dei ka sngi kaba pynkmen ia ki bor ba dei khmih jong ka Meghalaya Boxing Association, bad kane ka la wan hadien ba u Bhalang Shadap u la ioh ban khur ia ka takma rupa ha ka kyrdan iakhun kaba 67 Kg, bud pat sa da ka jingioh ban khur ia ki takma rnong lyngba u Sanjeev Maskut 48kg, Khrawbok Marwein 51kg, Banjop Nongkhlaw 54kg, Sunil Limbu 57kg,Ram Lyngdoh 60k bad ka  Riteeka Sarki 57kg.

Katba ha ka jingialehkai jong ka taekwando, ka kynhun ialehkai ka jylla kila lah ban ioh khur lai tylli ki takma rnong ba la wan lyngba u Honda O Hi Papang ha ka kyrdan iakhun jong ka 80kg, ia kaba la bynrap pat  sa ka Asha Sunar haka kyrdan iakhun kaba 40Kg ki kynthei bad ka Evadahunshisha Kharmudai naka kyrdan iakhun  ba 43 Kg.

Haba phai sha ka jingialehkai jong ka Lawn Tennis ka kynhun ki rang ialehkai ka jylla ki la shah liem noh ha ka Assam ha ka jingiakhun ka team event, katba ka Sasha ka la shah liem ha ka nongialehkai ka Assam ha ka jingiakhun kaba paramarwei.

Kumta ha kaba kut jong ka sngi kaba saw, ka Meghalaya kam shym la lah ban ioh khur satia ia ka takma rnomng, hynrei ba kan ioh ban khur 1 ka takma rupa bad 12 tylli ki takma rnong.

Lada yn ia phai pat sha ka jingioh ban khur takma kyllum (overall) da ki jylla ka thain, kumba ka mih paw hi ka long ba ka Meghalaya ka don shaduh ka kyrdan kaba 6 jong ka miej ioh khur takma, kaba la wan hadien ba ka la ioh ba kan khur tang 2 tylli ki takma ksiar, 6 tylli ki takma rupa bad 28 tylli ki takma rnong bad haba khein kyllum ka Meghakaya ka la ioh ba kan khur 36 tylli ki takma.

Katba ka jylla kaba don halor duh ka miej ioh khur bun tylli ki takma dei ka Manipur, bud pat sa ka Nagaland ha ka kyrdan kaba ar, ka Assam ha ka kyrdan kaba lai, ka Mizoram ha ka kyrdan kaba saw, Arunachal Predesh  ha ka kyrdan kaba san.

Katba ia ka kyrdan kaba 6 bad kaba 7 la bat ia ki da ka Sikkim bad Tripura.