Ha ka kyrdan ba 7 poi ka Meghalaya ha ka miej khur takma ki jylla  ka lympung 3rd North East Games

Syllad | The Rising MeghalayaMarch 23, 2024

Ka jingpynkhreh, jingangnud ban shem bad iohi ba ka jylla kan nang iai tbeh sha ka thong ban kiew shakhmat ha baroh ki jait jingialehkai mynta ki kylla khongpong khongdeh lut, niuma, kampher wat hadien ba la shem bad iohi lut ia ki har rukom ki jingpynlut bad theh spah theh hajar, ban pynlong ia ki rynsan ne ki lympung ialehkai kiba kynsai ha la ka jylla, phewse haba lada phai  haduh ka sngi kaba kut jong ka lympung 3rd North East Games ba la long ha Nagaland, ka Meghalaya ka da hiar syndon shaduh ka kyrdan kaba 7, tam tang salit haneng  ia ka jylla Tripura, kaba don ha ka trai duh ka miej khur takma jong ki jylla.

Kaei kaba ym shim la leh bad la pynlong hangne hapoh ka jylla, katno tam lei lei hadien ba ka jingpang iabit Covid 19 kaba la wan ban lyngshop ka la jah noh, ka jylla ka la shongshit bad sawa beit ki sur ia  risa ia kynhoi ha man la ki jingpynlong ia ki har rukom ki jingialehkai, ka jingkyrmen ba kine kiba la pynlong baroh, kin siew spah da ka jinglah ban paw ne ban tyngshain ki khun samla ha ki lympung ialehkai.

Tang kumban shu pynkynmaw ha u bnai Kyllalyngkot mynta ka snem, ka sorkar jylla ka la theh  jan haduh 23 klur tyngka ban pynlong ia ka lympung bah ialehkai  ka jylla ka Meghalaya Games ha Tura West Garo Hills District, ia kaba la khmih lynti ba kat kane ka spah bah kaba la theh, ki khun samla ka jylla kin sdang ba kin paw bad ban nang kham tyngshain noh ha ka jingim ialehkai ka jong ki.

Pynban ka spah bah kaba la theh kumba la shem bad iohi pat mynta na ka 3rd North East Games kam lah ban pynsngew pangmet pat ia ka dohnud bad ka mynsiem uba bun balang, hato ka Meghalaya State Olympic Association ka don aiu pat ban ong ne ba kan pynshai sha u paidbah….?

Ka 3rd North East Games ka la poi sha ka jingpynhap noh ia ka pyrda ka jong ka mynta ka janmiet, bad kumba la dep ban kdew ne maitphang lypa haneng, ha u snem ba la dep haba la pynlong ia kane ka lympung hangne hapoh ka jylla lajong, ka Meghalaya ka bat ia ka kyrdan kaba saw, hynrei mynta pat u snem jrain hiar shaduh ka kyran kaba 7, hadien  ba la kut noh kane ka lympung, ka Meghalaya ka la lah ba kan ioh ba kan khur  tang 2 tylli ki takma Ksiar, 12 tylli ki takma Rupa bad kaba bun eh pat dei ka takma Rnong, kaba  la ioh ban khur haduh 41 tylli bad haba khein kyllum lang pat baroh la ioh ban khur 55 tylli ki takma.

Ha shwa ba kane ka lympung kan khreh ban jam noh pat sha kaba kut, ka kynhun ki rang bad thei ialehkai ka jylla, ki la ioh ba kin khur ia kumba kato katne tylli ki takma, ha kaba la sdang shwa na ka iakob jong ka Cross Country ki kynthei bad shynrang, kaba hangne ki nongiamareh ka jylla  khamtam lei lei na ka liang ki samla kynthei ki la ioh ba kin khur ia ka takma rupa kaba ha kane ka kynti la mih khmat da ka  Bandasharai Marweiñ, Ibanriakor Lyngkhoi, Claire Jones Jala Kharbhih bad ka Barisha Khymdeit.

Katba na ka liang ki shynrang, ka kynhun ia mareh ka jylla ka la ioh ba kan khur ia ka takma rnong ia kaba la mihkhmat da u Kresstarjune Pathaw, Knerlang PhawaIohborlang Nongspung bad u Dabit Dkhar.

Kumta haduh ban da kut jong ka sngi kaba san bad ba khatduh jong kane ka lympung, na ka Athletics, ka Meghalaya ka la ioh ba kan khur 2 tylli ki takma ksiar, 5 tylli ki takma rupa bad 9 tylli ki takma rnong bad baroh ki long 16 tylli ki takma.

Katba ha ka jingialehkai jong ka Lawn Tennis, ki shi jur ki rang ialehkai ka jylla ba la la mihkhmat da u Wankhraw Wahlang Nongrum bad Eric Suchiang ki la ioh ban khur ia ka takma rnong.

Pynban kaba kham pynbynnud eh pat kan dei ia ka kynhun ki thei ialehkai basketball, kiba hapdeng ka jingiakhun kaba jur bha ka jong ki ban mad ia ka nam rem kaba long tnoit tang da 1 point hakhmat ka Sikkim katta da 60-61 point.

Katba ha ka iakob siat khnam ne Archery, ka kynhun ki rang ialehkai jong ka recurve ka jylla ki la ioh ban khur ia ka takma  rnong bad ha kane ka kynti, ia ka kynhun la mihkhmat da u Mukesh Tamang, Larilang Lyngdoh, Devraj Mohapatra, Amebalaker Wanniang.

Pynban ka khubor kaba lam ha kaba kham pynkmen ka wan na ka kynhun jong ka kynhun ka recurve jong ki samla kynthei kiba la ioh ban khur ia ka takma rupa kaba ha kane ka kynti la mihkhmat ia ka da Navidisha Kapoor, Daphishisah Jamu, Damandashisha Pasi bad ka Andrica Nongsiej.

katba ha ka kyrdan iakhun jong ka Recurve mixed team, ki shi jur ki nongialehkai ka jylla ba kynthup ia , Mukesh Tamang bad Navidisha Kapoor ki la ioh ba kin khur ia ka takma rupa.

Katba kawei pat ka jingialehkai ia kaba ym pat juh bna bad iohsngew koit ia ka, hynrei ki nongialehkai ka jylla kila pynpaw ia ka jingdon jong ka sap ba nylla ka jong ki ka dei ka Belt Wrestling, ha kaba ki nongialehkai ka jylla  ki la la ioh ba kin khur ia ki takma ki jong ki.

Ha kane ka kynti, u Kyrshanbor Romeo Songthiang u la ioh ban khur ia ka takma rupa na ka kyrdan iakhun kaba 60 Kg bud pat sa  Lorenza Songthiang bad  Sany Khyriemmujat kiba la ioh ban khur ia ka takma rnong na ka kyrdan iakhun kaba 60 Kg jong ki kynthei.

Katba ki jingialekai kiba kum ka kynhun da da shah brut ne ba khlem da lah ban ioh wanpai sha la iing ryngkat bad ki takma dei na ka football ki shynrang, nangta ka volleyball bad ka badminton.