Ha ka sien kaba nyngkong rakhe ‘Parents Day’ ka Mawlang Govt LP School, Mawkynrew 

Syllad | The Rising MeghalayaOctober 20, 2023

Ka Mawlang Government LP School, Mawkynrew Block, East Khasi Hills District bad kaba  hap hapoh ka jingpeit jong ka Syntung Cluster ka la rakhe ia ka sngi ‘Parents Day’ ha ka sien kaba nyngkong eh ha ka 18 tarik Risaw 2023.

 La seng ia kane ka skul ha u snem 1961. Ha ka jingiaid lynti jong kane ka skul ha ki 62 tylli ki snem kane ka dei ka sien kaba nyngkong eh ban don kum kine ki jait program kiba heh ha ka skul bad ka shnong jong ki. Ka shnong lem bad ki kmie ki kpa jong ki khynnah skul ki la iashimbynta lang baroh ban rakhe ia ka sngi burom ki kmie ki kpa.

Kane ka dei ruh ka sngi ban sah jingkynmaw ia ka skul ba ki la ïoh ban pyllait paidbah nyngkong ia ‘Ka School Anthem bad ia Ka Lama’  jong ka skul ha ka jingdon lang jong u Bah Banteidor Lyngdoh MLA ka Mawkynrew Constituency kum u kongsan, bad u Bah Martle N. Mukhim MDC ka Mawkynrew Constituency kum u symbud kongsan lem bad ki staff na ka Block Mission Coordinator (BMC).

Na ka liang ka dorbar shnong da ka jingkmen kaba khraw ka la pynlong ruh da ka jingkhang shnong bad ban leh sngewbha baroh shi shnong bad la pynphuh pynphieng shuh shuh ha kane ka sngi da ki duhalia na ka shnong. La pyni ruh ki sap ki phong bapher bapher jong ki khynnah skul ha la ka rwai ka siaw, ka shad ka kmen lem bad ki jingshad kaba pyni ia ka rukom im ki nongshong shnong ha Mawlang.

Nalor kata da ka jingtrei shitom jong ki laingut ki nonghikai kiba dang shu wan pyniasoh ha u snem 2021, ki la lah ban pyntyllun bad pynlong ia kane ka program kaba jop bad kaba i shongkun bad kaba i shongkun hapdeng ki kmie ki kpa bad ki nongshong shnong.

Lyngba ka jingdon jong kane ka program hapoh shnong ka la iarap ban pynsngewthuh ia ki kmie ki kpa ia ka dor longkmie longkpa bad ka kamram jong ki ha ka pule puthi jong ki khun ki kti.

Shuh shuh ka jingpynlong ia kane ka program hapoh skul lem ha Shnong ka kyrsiew thiah ia ki kmie ki kpa ba kin don ka jingkitkhlieh ia la ki khun ki kti bad ruh ia ki nonghikai ba kin nang iaitrei shitom bad ban wanrah ia ka jingkylla hapoh skul bad ha ka shnong ka thaw hi baroh kawei.