Ha ka taiew ban wan yn shong jingialang ka CoMSO ban pyrkhat iaki lad jingiakhih ILP

Syllad | The Rising MeghalayaNovember 13, 2020

U Robertjune Kharjahrin, Chairman, CoMSO ula ong ba ka CoMSO la shem taiew kan shong jingialang ban ia pyrkhat noh da ki lad jingiakhih paidbah pyrshah ia ka jingkuman ka sorkar India halor ka ILP.

Ula ong ruh ba ki pyrshah jur ia ka jingpynphai noh u Lat ia ka MRSSA Amendment Bill 2020, ban pyrshah ia ka jingpyntreikam ia ka CAA bad kin pyntikna ba ym don uwei ruh u nong Bangladesh uba la rung beaiñ ba un ioh long nong India lyngba ba ka Citizens Amendment a Act (CAA) ha Meghalaya. 

Na ka Liang Jong ka CoMSO ka pynpaw ba ngi dap da ka jingsngewsih ban ioh sngew na u Chief Minister ka Jylla  u Conrad Sangma ba hana kata ka Sorkar India kam pat dep pule ia ka ILP Resolution Jong ka iing Dorbar Thawain ka Jylla kaba don tang 2 page mynta la jan dap shisnem. Kawei ka khristmas ka la leit bad sa kawei kan wan ka Sorkar India Kam pat don por ban pyrkhat ia ka jingthrang ki paidbah ka Jylla ban ioh ka aiñ iada Ri ka ILP.

“Kane ka jingleh meinah ka Sorkar India ia ka Jylla bad ka jinglong diengshaindoh ka sorkar Jylla kaba shu sngap katba kren ki heh BJP na Delhi ka long kaei kaei ka bym lah shuh ban pdiang. Ngi la iaishah bad khmih lynti ba ka sorkar Jylla kan iaisaid ban pynioh ka ILP ha ngi hangtei ha Delhi hynrei imat mynta ngi don kam biang ban mih madan ha surok ban dawa ILP,” la ong Robertjune Kharjahrin.