Ha kaba khatduh, hiar jurip u ma Sniawbhalang dalade iaka Namdong CHC bad C&RD Block

Syllad | The Rising MeghalayaOctober 5, 2024

Ha kaba khatduh eh u Deputy Chief Minister bad u MLA ka Nartiang u Ma Sniawbhalang Dhar haka 4 tarik Risaw dalade ula hiar jurip iaka Namdong CHC bad ka ophis Namdong C&RD Block hadien ka jingud jingnam uba bun ba lang halor ka jingdkhoh treikam kine ki lad ai jingshakri ka sorkar sha u paidbah wat hadien ba la kyntiew kyrdan iaki naduh u snem 2022.

U Ma Sniawbhalang Dhar ha kane ka jingjurip jong u la iadonlang u Waheh Shnong Namdong B u ma Damian S War, Secretary Shnong Namdong B Serus Lipon nalor kiwei kiwei ki riew rangbah ka thain bad ki nongialam shnong.

U Deputy Chief Minister ha kane ka jingjurip u la ioh ruh ban iasyllok bad ka doctor incharge ka Namdong CHC Dr Arda Laloo bad kiwei ki Doctor kiba trei ha kane ka CHC haka jingiadonlang u DMHO, West Jaintia Hills District. Na kaliang ki doctor kila ai ruh da ka jingthoh sha u ma symbud myntri iaki jingduna ka hospital. Kawei pat kaba la paw bha sha ki lad pathai khubor ka dei ka jingthut ka bording.

Na kaliang u ma Sniawbhalang, ula kular ban shimkhia ban pynbiang ia baroh ki jingdonkam naduh ki doctor, nurse bad ki nongtrei ka CHC. Ula ong ruh ban shen yn shna noh iaka surok ban poi sha ka CHC bad ban pynioh ia kawei ka ambulance bad ban ai rong airup iaka building ka bad baroh ki quarter ba sah ki nongtrei kane ka jaka sumar.

Ha kane ka juh ka sngi, u ma Sniawbhalang ula jurip ruh iaka ophis ka Namdong C&RD Block bad kular ban pyntreikam pura noh ia kane ka ophis ban suk ki paidbah namar ba haduh mynta ki paidbah ka thain ki dang hap ban pyndep iaki jngdonkam ha Thadlaskein C&RD Block.

Ki shnong kiba hap haka Namdong C&RD Block ki kynthup iaka Namdong-A, Namdong-B, Mynkhnang, Umjalisiaw, Lumrot, Madanrtiang, Thadmukoh, Khonsaro, Kremmyrsiang, Thadmynri, Mynkrem, Khliehriat, Iongsnieh Takhniang, Saphohwaiong, Sanaro, Pdeiniadaw, Pdeniaw-musiang, Ringkyrtein, Moobakhon, Nongthymme, Mookjat, Moorap, Ksehrynshang, Kremlabit, Nongmulieh, Khanduli, Rudumplu, Umshangiar, Saitsama, Tamu, Shiabnai, Lakaroi Pnar, Mukoiram, Lad-Myngngor, Pdeintaloo, Lumlakhiat, Lapangap, Myngngor, Myn-I bad Rtiangsanphew.