Ha kano ka por phi lah ban law iaka mask

Syllad | The Rising MeghalayaJuly 17, 2020

Ka Sorkar Jylla lyngba Commissioner & Secretary, Government of Meghalaya, Health & Family Welfare Department, Sampath Kumar, IAS haka 14 tarik u Naitung kala pynmih ka kyndon iaka por ban deng bad law iaka mask ban iada naka khlam COVID-19.

Katkum ka kyndon bala bthah da ka tnad ka koit ka khiah ki don lai tylli kiba la rikomen ba ngi dei ban leh bad kim dei kiba shitom ban leh ban iada naka jingpur ka khlam COVID-19.

Kine harum ki dei kita kiba la rikomen ka tnad ka koit ka khiah:

Ban deng iaka mask.

Dei ban sait khuid iaka kti bun bun sien da ka um bad ka sabon lane da kaba pyndonkam da ka dawai sait kti sanitizer.

Ban ieng bad shong kham pajih kata haduh 6 phut ha ki jaka paidbah.

Kine lai tylli kim mat ki dei ba baroh na ngi, ngi lah ban leh, hynrei katkum ka hukum jong ka sorkar lap ba kiba bun hi ki paidbah kim bud ia kine ki jingbthah kaba lah ban wanrah iaka jingpur ka khlam COVID-19. Ka Sorkar kala ai bor ia u Executive Magistrate bad u Pulit ophisar ban dain kuna ia kiba pynkhein aiñ haduh T.500 haka sien kaba nyngkong ia kino kino kiba pynkhein iaka kyndon bala bthah ka tnad ka koit ka khiah.

Ka jingdain kuna kalong naka bynta ban pynbeit iaka jinglong jong ngi ki briew, namar ba u/ka uno uno u lah ban long u nongrah iaka khlam.

Iaka mask dei ban deng da baroh marsien mih nala iing. U/ka briew ba don ka jyrhoh bad kiba don jingshit wat la ki don hapoh iing ruh ki dei ban deng iaka mask.

Baroh ki briew kiba la palat 2 snem ka rta shaneng ki dei ban deng mask haki jaka paidbah bad ha ki jaka bun briew kaba ym dei naka longiing jong ki bad ha ki jaka ba shitom ban bud iaka kyndon social distancing ne ban ieng bad shong kham pajih.

Ka jingdeng iaki mask ka dei salonsar ia baroh ha ki jaka paidbah ha ki jingialang kumjuh ha ki iew ki hat.

Ia ki mask dei ban deng, wat ha ki iing kiba rung ki mih bha ki briew, taxi, bus, dukan, ki jaka ialehkai, ophis bad kiwei kiwei ki jaka kiba iaid ieng ne pyndonkam paidbah.

Dei ban tap bha iaka ktien, khmut haba jyrhoh ne synriah. Pyndonkam da ka jain rumal ne da ki tissue.

Hynrei ki don pat ki khep ba ka jingdeng iaki mask ka wit ne pynthud bad khamtam da ki bun bun kynta, hynrei lada lah ban bud ia kine ki kyndon harum lah ban weng ne law iaka mask.

Ki Por ba lah ban weng ne law iaka mask:

Haba u briew u don marwei haka jingiaid lynti haka kali (U/Ka Nongniah) ki lah ban weng iaka mask haba niah kali, hynrei lada sangeh ban iakren briew ne mih naka kali mar mar hap ban deng iaka mask.

Haba leit jingleit na ka juh ka longing lane ban leit sha ophis haka juh ka kali bad don napdeng kiba weng iaka mask, war la ki iajan ruh kim pynkhien iaka kyndon hapoh kali namar ba ki tip ruh iano ki ia kynduh.

U/ka  nongshong dukan haba shong marwei u lah ban law iaka mask haba ym don nongthied nongpet, hynrei mar sien wan ki nongthied ki nongdie dukan ki dei ban deng iaka mask.

Haba iaid lynti haka surok kaba kynjah briew ne ba duba briew kaba jngai na ki briew uno uno u lah ban weng iaka mask, hynrei lada bun briew bad ym lah ban kiar ia ki briew dei ban deng iaka mask.

Ha ki jaka trei ruh dei ban deng iaki mask khamtam haba shong bad ki briew bym ithuh, hynrei lah ban weng iaka mask haba shong bad ki para ba iatreilang da kaba shong kham pajih.