Ha ki hynniew jaka yn niew ia ki vote na ka bynta ki 29 tylli ki constituency ka KHADC

Syllad | The Rising MeghalayaFebruary 20, 2025

Ka Tnad District Council Affairs (DCA) ka Jylla ka la pyntip ha kaba iadei bad ki jaka niew vote na ka bynta ka elekshon sha ka iingdorbar ka Khasi Hills Autonomous District Council (KHADC) ha East Khasi Hills District, West Khasi Hills District, South West Khasi Hills District, Eastern West Khasi District bad Ri Bhoi District ka ban long ha ka 24 tarik Rymphang naduh ka por 8 baje mynstep.

Katkum ka jingpynbna ba la pynlong ha ka 17 tarik Rymphang, ka jingniew ia ki vote na ka bynta baroh ki san tylli ki constituency hapoh Ri Bhoi District kan long ha NSCA Indoor Stadium, Nongpoh.

Ka jingniew ia ki vote na ka bynta ki artylli ki constituency ha Eastern West Khasi District kan long ha Multipurpose Hall ha ka ophis u Deputy Commissioner (DC), Mairang.

Ka jingniew ia ki vote na ka bynta ki artylli ki constituency ha South West Khasi Hills District kan long ha Multipurpose Hall ha Ophis DC.

Ka jingpynbna ka pyntip ruh ba ka jingniew ia ki vote na ka bynta ka Mawphlang Diengiei, Nongspung-Sohiong, Sohryngkham, Mawkynrew, Nongkrem, Mawsynram, Mylliem, Laban- Mawprem, Nongthymmai, Laitumkhrah-Mawprem, Mawkhar-Pynthorumkhrah, Jaiaw bad Mawlai kan long ha Inter State Bus Terminus (ISBT), Mawiong, Shillong.

Nalor kata ka jingniew ia ki vote na ka byna ki laitylli ki constituency ha West Khasi Hills District kan long ha Ophis DC, Nongstoin, katba ka jingniew ia ki vote na ka bynta ka Lyngkyrdem Laitkroh bad Nongskhen kan long ha ophis u SDO (Civil), Pynursla.

Katba ka jingniew ia ki vote na ka bynta ka Sohra bad Shella kan long ha New Conference Hall, ka ophis u SDO (Civil), Sohra.