Ha nongbah Delhi wan poi baroh ki 27 ngut ki nong Meghalaya na Israel

Syllad | The Rising MeghalayaOctober 13, 2023

Baroh ki 27 ngut ki nongshong shnong ka Meghalaya ki la wan poi ha ka nongbah Delhi haka step sngi Thohdieng hadien ba ki la mih noh na Israel namar ka jingiaumsnam kaba la khie kynsan hapdeng kame la ri bad ki lehnoh Hamas kaba la shim ia ka jingim jong ki hajar ngut ki briew.

Napdeng kine ki 27 ngut ki nongleit pilkrim kiba la hap ban wanphai noh na Israel ki kynthup ruh ia u Dr. WR Kharlukhi uba dei u MP ka Rajya Sabha na Meghalaya.

Kine ki 27 ngut ki nong Meghalaya ki dei kiba la ia don lang ha ka kynhun jong ki 212 ngut ki nong India kiba la lah ban wanphai suk sha la ka jong ka ri, kata hadien ba ki la  mih noh na Israel bad leit sha Cairo, Egypt ha ka 9 tarik mynta u bnai.

Ia kane la pyntip da u Myntri kam bar ri ka India u Dr. S. Jaishankar uba la pynpaw ba lyngba ka ‘Operation Ajay’ la lah ban pynphai noh ia kine ki 212 ngut ki nong India  kiba la wan poi  da ka liengsuin ha New Delhi. Une u Myntri ka Sorkar pdeng u la pyni ruh ia ki dur ki dar jong kine ki nong India kiba don hapdeng ka jingkmen hapoh ka liengsuin hadien ba la lah ban wallam pat ia ki hapdeng ka jingshngain.

#OperationAjay gets underway.

212 citizens onboard the flight are enroute New Delhi. pic.twitter.com/fGSAYiXbBA

— Dr. S. Jaishankar (Modi Ka Parivar) (@DrSJaishankar) October 12, 2023