Ha Shillong yn pyni ia ka phlim “Ka Chithi” hadien ba ioh jingjop hapoh ka Ri
Ia ka phlim Jaintia “Ka Chithi” kaba dei ka phlim kaba paw bha yn sa pyni paidbah naduh ka 7 haduh ka 12 tarik mynta u bnai ha U Soso Tham Auditorium Shillong, kata ha ka por 2 baje mynsngi, 4:15 janmiet bad 6:30 janmiet
Kane ka phlim ba la shna da ka nongshna phlim ba pawkhmat ka Kong Simi Khongthiang ka la dep lypa ban ioh ia ka jingithuh ha kylleng jong ka Ri.
![](https://www.syllad.com/wp-content/uploads/2024/09/JIT-Vacancy-823x1024.avif)
Kane ka phlim ka dei ruh kaba la ioh pdiang ia ka khusnam Best Director Award ha ka jingialang sam khusnam “Prag Cine Awards” bad la pyni paidbah ruh ha ka tamasa “Bengaluru International Film Festival” kumjuh ha North East International Film Festival kaba la long ha Imphal.
Nalor kata la khmih lynti ruh ba kane ka phlim kan khring ia ki paidbah ha ka tamasa “Habitat International Film Festival” ka ban sa long ha ka nongbah Delhi.
Haba pynpaw ka jingsngewnguh halor ki jingai jingkyrshan jong u Myntri bad ka Tnat Arts and Culture ka sorkar Jylla ban kyntiew ia ki kam pynmih phlim hapoh ki trai muluk ka jylla, ka Kong Simi Khongtiang ka la kyrpad ruh ia ki paidbah ba kin ai ia ka jingkyrshan da kaba wan ban peit ia kane ka phlim.
Ka jingpyni paidbah ia kane ka phlim “Ka Chithi” kan nangai mynsiem ha ki kam shna phlim hapoh ka thain Ri Lum Jaintia, kata ha ryngkat ka jingkut jingmut jong ka sorkar ban ai ka jingkyrshan ban kyntiew ia ka kam karkhana pynmih phlim hapoh ka jylla.
Leave a Reply