Ha Shillong yn pyni ia ka phlim ‘Rapture’ kaba la ioh jingiaroh shabar ka ri

Syllad | The Rising MeghalayaOctober 18, 2024

Ia ka phlim ‘Rapture’ kaba la ioh ka jingiaroh na kiba bun balang kaba la pynmih da u Director Dominic Megam Sangma yn sa pyni paidbah ha kane ka nongbah Shillong naduh ka 7 haduh ka 11 tarik u Naiwieng 2024.

Kane ka jingpyni paidbah ia kane ka phlim la pynlong da ka Tnad Arts and Culture ka Sorkar Meghalaya ha ryngkat ka jingiatreilang bad ka Fraternity Art Cine Entertainment Shillong (FACES).

Ia kane ka phlim ‘Rapture’ kaba la ioh jingiaroh na ki ri ka pyrthei la pyllait ruh dang shen ha ki 150 tylli ki jaka peitkai ha kylleng ka ri France ha kaba ka la ioh pdiang ia shibun ki jingiaroh namar ka khana bad halor ka rukom ringdur kaba pynshoh biej.

Kane ka phlim ka pyni ia ka jingwad bniah kaba jylliew ia ka jinglong tynrai bad ka jingsngew jong u briew ia kaba la shim shibun na ki jaka kiba itynnad jong ka Jylla Meghalaya. Mynta ki paidbah ha kane ka nongbah Shillong kin ioh ia ka lad ban sakhi da lade ia kane ka phlim ha kane ka nongbah ba la ring ha la ka jong ka jaka.

Yn pyni paidbah ia kane ka phlim hapoh U Soso Tham Auditorium lai sien ha ka shi sngi, kata ha ka por 12:15 mynsngi, 2:40 nohphai sngi bad ha ka por 5:15 janmiet.

Ia ki tiket yn sa die shen bad ka ban ailad ruh ia ki briew ba kin ioh jaka kloi sha katei ka jaka ban peit ia kane ka phlim kaba bun ki la ap khmih lynti.