Ha Shillong yn pynlong ia ka jingialehkai phutbol ‘Durand Cup’ ba la rim tam ha Asia
Ka Jylla ha ryngkat ki paidbah riew ieit phutbol mynta ka kynti kin lah ban sakhi shen ia ka lympung ialehkai phutbol kaba la rim tam hapoh Asia, ka ‘Durand Cup Trophy’ kata ia kawei na ki ‘Group Match’ jong ka ia kaba yn pynlong shen ha Madan JN Complex, Polo, Shillong.
Halor kane la pynlong ia ka jingialang ha ka 18 tarik Naitung ha U Soso Tham Auditorium ha kaba la wan ban iashim bynta da u Myntri Rangbah ka Jylla u Conrad K Sangma, u Myntri ka Tnad Sport & Youth Affairs u Bah Shakliar Warjri, u Lt Gen Sanjay Malik GOC 101 Area, u Maj Gen Rajesh A Moghe GOC Bengal Sub Area uba dei ruh u Vce Chairman DCOC bad kiwei kiwei.
![](https://www.syllad.com/wp-content/uploads/2024/09/JIT-Vacancy-823x1024.avif)
Na ka liang u Myntri Rangbah ka Jylla u Conrad K Sangma u ba la pyllait paidbah ia ka ‘Durand Cup Trophy’ ha kane ka jingialang, ha ka jingkren u la ai khublei kyrpang ia ki bor shipai kiba la pynpaw halor ka jingdon ia ka mon ban jied ia ka nongbah Shillong kum kawei na ki jaka ban pynlong ia ka ‘Group Stage’ jong kane ka lympung ialehkai.
U la ong ruh ba ha ka jingshisha la thmu ban pynlong ia kane ka lympung ha u snem ba la dep, hynrei ki jingeh kiba la mih namar ka jingbym pat biang jong ka madan ka la khanglad ia ka jylla ba kan ioh ban pynlong.
Watla katta u la ong ba na ka liang ka sorkar jylla ka la trei borbah na ka bynta ban pynurlong ia kane ka jingthmu ha kaba mynta ka snem la lah ban pynlong ia kane ka lympung ialehkai.
Katba na ka liang u Bah Shakliar Wajri u la ong ba ha kaba sdang u pynpaw ia ka artatien la yn lah ne em ban pynlong ia kane ka lympung ialehkai mynta ka snem, hynrei ka rai rangbah bad jingskhem jingmut jong u Myntri Rangbah ka la lah ba kan pynurlong ia kane ka jingangnud, ha kaba ha kane ka sngi ka jylla kan pynkhreh ban pynlong ia kane ka lympung.
Yn kylla ka JN Stadium ka madan ialehkai ba paka lyngba ka ‘Durand Cup’
Haba kren sha ki lad pathai khubor, na ka liang ki bor shipai kiba pyniaid ia kane ka lympung ka ‘Durand Cup’ ki pynpaw ia ka daw ba kongsan balei ki thrang ban pynlong ia ka group match ha kane ka nongbah Shillong, kata namar ba ki paidbah nongshong shnong ka jylla la tip bha halor ka sngewtynnad bad ieit ia ka jingialehkai photbol.
Ki heh shipai ki pynpaw ruh ka jingsngewnguh ia ka sorkar jylla kaba wat lada kam shym la lah ban pynbiang ha u snem ba la dep, hynrei mynta ka snem ka la trei borbah ban lah ban pynurlong ia kane ka lympung ialehkai.
Haba phai sha kane ka madan, ki pynpaw ba mynta ka long ba lada ther katno katno u ‘lapbah u lapsan hynrei shisien ba la kynrong ka bneng tang shiphang por yn ym lap shuh wat tang ki shi jaw ka um, kaba pynpaw ba haduh katno la tei ban shna bha ia ka.
Kumta mynta ka shong eh satang ha ki paidbah la kin ia mih ne em shakhmat ban sakhi ia ki jingiakhun ki group stage ki ban long ha kane ka madan, namar lada kam don ka jingmih paidbah, kata ka mut ba baroh ki jingpynkhreh kin long sepei.
Kumjuh ha kaba iadei bad ki tiket jong ki jingiakhun ban long hangne ha nongbah, la pyntip ba la sdang ban die paidbah naduh ka 18 tarik mynta u bnai bad ha ki katto katne ki jaka kiba ki paidbah ki lah ban thied bad ioh da kaba suk.
Leave a Reply