Ha shrip ki BSF ngat 13 ngut ki nongkhaii beain na Bangladesh, kurup ki mar ba kot palat T.10 lak

Syllad | The Rising MeghalayaDecember 24, 2024

Ki shipai Border Security Force (BSF) Meghalaya Frontier ha ka 22 tarik Nohprah ki la ioh ban kem noh 13 ngut ki nong Bangladesh kiba donkti ha ki kam khaii tuh na ki jaka khappud hapoh West Jaintia Hills District.

Kane ka jingioh kem ia kine ki nong Bangladesh ka la wan long ruh hadien ka jingpynlong ia ka jingkhynra kaba kyrpang hadien ka jingioh ia ka jingtip kaba thikna.

Kine ki mar kiba la ioh kurup, nalor ki 35 byrni ki song shini, ki shipai ki la ioh ruh ban kurup ia kiwei pat ki mar kiba kynthup ia ka kyiad, slasha, waiar tama, sikret, jainkup, jingtah khmat, rynsun lem bad kiwei pat ki marbam kiba kot haduh palat T.10.50 lak.

Hadien kane ia kine ki briew la aiti noh sha ki bor pulit hapoh Dawki Police Station, West Jaintia Hills na ka bynta ban pynlong shuh shuh ia ka jingtohkit bad ban leh ia kaba donkam hadien ba la pyndep ia ka jingjurip iaka koit ka khiah jong ki ha PHC Dawki.

Ki shipai BSF ki la pynlong ia kane ka jingkhynra ha baroh ki thain khappud jong ka East Khasi Hills, East Jaintia Hills bad South Garo Hills districts.

Kane ka tnad shipai ka dang bteng ruh ia ka jingkut jingmut kaba skhem ban iada ia ki jaka khappud jong ka Ri India bad ban tehlakam ia ki kam wan rungtuh bad ia ki khaii beain lyngba ki jaka khappud.