Ha shrip ki pulit ngat 3 ngut ki dkhot ‘sleeper cell’ ka HNLC na Ri Bhoi namar ki kam dawa pisa

Syllad | The Rising MeghalayaJune 11, 2024

Ki bor pulit haka 11 tarik Jylliew ki la lapdien ia ka jingtreikam ka ‘sleeper cell’ jong ka Seng kieng atiar Hynniewtrep National Liberation Council (HNLC) bad ioh ban kem noh ia laingut ki dkhot kynthup ia u nongialam namar ka jingdonkti ha ki kam dawa pisa bad ki kam byrngem byrsit ia kiba bun ki riew shimet ba ki dei ban siew ia ka pisa kaba ki la dawa ne mad ia ka jingeh.       

U SP ka Ri Bhoi District u Jagpal Singh Dhanoa ula ong ba kine ki laingut ki dkhot kiba la shah kem noh ki dei kiba la tip kyrteng kum u Cyfrank Paul Pariat (25), uba khlieh ia ka sleeper cell kum u nongialam ba halor ka HNLC, u Kitbok Mujai (23) bad u Barnabas Lyngdoh (49 snem rta).        

Une u heh pulit u la ong ba hadien ka jingphah ia ki shithi dawa pisa sha kiba bun ki riew shimet, na ka liang ki pulit ka Ri Bhoi ki la lah ban lapdien noh ia kane ka jingtreikam ba rieh ka HNLC ha ka thain Mawhati-Umroi, Ri Bhoi District bad ha ka nongbah Shillong.

Ia kane ka sleeper cell ka HNLC la khlieh da u nongialam ba halor ka HNLC u Cyfrank Paul Pariat uba dei na ka shnong Ummat. Ma u ha ryngkat ki dkhot ka kynhun runar jong u la ong ba ki la phah ia ki shithi dawa pisa na ka bynta ka seng HNLC bad byrthen ruh ia kiba bun ki riew shimet ba ki dei ban siew ia kane ka pisa kaba ki la dawa ne ki lah ban mad ia ka jingeh.

Na ka liang u SP u la ong ba na ka liang ki bor pulit ba kyrpang na Police Headquarter bad napoh Ri Bhoi ki la pynlong ka jingleit khynra ha ka 10 tarik mynta u bnai ha kaba ki la ioh ban kem noh ia kine ki dkhot ka HNLC.

Kine ki laingut kiba la shah kem bad shah pynngat ha ki kyndon UAP Act ki donkti ruh ha ki kam pynrung dkhot, ki kam dawa pisa bad ki jingialap na ka bynta ka kynhun HNLC ki la leit ruh sha Bangladesh ha u snem ba la dep na ka bynta ban ioh jinghikaim, ong u SP.              

Na ka liang ki pulit ki la rejister case pyrshah ia kine ki laingut bad ka jingtohkit ka dang iaid shakhmat ban lapdien shuh shuh ia kiwei pat kiba donkti bad ka seng HNLC, u la bynrap.       

Ha kajuh ka por u SP u kyrpad ia ki paidbah ba kim dei satia ban siew ia ka pisa ba la dawa da ka seng HNLC hynrei ban wan shakhmat ban pyntip lada don kiba phone na ka bynta ban dawa pisa jubor.