Ha shrip ki pulit ngat 3 ngut ki suba HNLC kiba thmu pynbthei bom IED na Ri Bhoi bad West Jaintia Hills

Syllad | The Rising MeghalayaAugust 22, 2024

Ki bor pulit ka Jylla ki la ioh ban kem noh ia laingut ki suba ehrang jong ka Seng Hynniewtrep National Liberation Council (HNLC) napoh Ri Bhoi bad na West Jaintia Hills kiba donkti ha kaba iasylla ban pynbthei bom IED ha kiba bun ki jaka hapoh Rilum Khasi bad Jaintia.

U Superintendent of Police ka Ri-Bhoi u Jagpal Singh Dhanoa u pyntip ba kine ki laingut ki la shah kem noh namar ka jingiasylla bad ki dkhot ka HNLC napoh Bangladesh lem bad kiwei pat ki bym pat ki bym lah ban ithuh ban leh ia ka kam pynbthei bom.

U la ong ba ki pulit ki la ioh ban kem noh ia u Equest Langsiang uba dei na ka shnong Nartiang, West Jaintia Hills na lad ban leit sha Bethany Hospital, Nongpoh ha ka 20 tarik mynta u bnai ha ka por kumba 12:30 mynmiet ha kaba ki la ioh ruh ban kurup ia ki sakhi satar lyngba ka mobile phone jong u ia kaba la kurup noh.

Hadien ka jingtohkit, u Equest u la pdiang ba u dei u dkhot ka HNLC bad ba ki don ia ka jingthmu ban pynbthei bom IED ha ryngkat bad kiwei pat ki dkhot ka seng HNLC.

Nalor kata u la phla ruh ia ka kyrteng jong kiwei pat ki dkhot kiba kynthup ia u Deiborlangki Sariang na Nartiang, West Jaintia Hills bad u Markhlan Biam uba dei na  Laskein, West Jaintia Hills.

Hadien ki pulit ki la ioh ban kem noh ia sa ia kine ki arngut na Jowai bad Nartiang ha kaba  kiba la phla ruh ba ki dei ki dkhot jong ka seng HNLC bad halor ka jingiasylla ban pynbthei bom IED ha ka 14 bad 15 tarik une u bnai lyngba ka hukum na ki nongialam jong ka Seng kiba don hapoh Bangladesh.

Na ka liang ki pulit ki la rejister case ha Nongpoh police station hapoh ki kyndon No.87(08)2024 U/s 113 (3) (5) BNS pyrshah ia kine ki laingut ki HNLC.