Ha shrip ki pulit ngat ki runar kiba donkti rahbor ia ki draibar trok ban dawa pisa

Syllad | The Rising MeghalayaNovember 9, 2023

Ki pulit na ka tnat Special Cell ka East Khasi Hills ki la ioh ban kem noh ia laingut ki briew kiba donkti ha kaba rahbor ia uwei u draibar trok kit jhur bad dawa phah pisa na ki trai kali lyngba ka Google pay ha ka kyrteng jong ki nongkhaii jhur kaba ha ka jingshisha ki dei ki nong rahbor.

U Superintendent of Police (City) ka East Khasi Hills, u Bah Vivek Syiem u pyntip ba ki la ioh ia ka jingtip ia ka jingdon ka kynhun runar kiba ju khroh bad pynbiej ia ki draibar trok ba kin pynkohnguh ia ki trai jong ki ban thied jhur ha ka dor kaba bit.

Hynrei, kine ki briew ki la ialam noh ia u nongniah sha ki bynta jong ka thain ISBT lane ki thain Damsite (Umiam) na ka bynta ban pynkit ia ka mar. Hadien ba la poi ha kine ki jaka ki la rahbor noh ia u nongniah sha kiwei pat ki jaka khlaw bad pynbor ban phone sha u trai ba ki la dep ban pynkit ia ki jhur bad ba un phah ia ka pisa lyngba ka Google Pay sha u nongkhaii ne supplier kiba ha ka jingshisha ki dei ki nongrahbor.

Da ka jingiarap ki dkhot jong ka Seng Meghalaya Traders Fresh Vegetable & Ginger Association bad ka Khasi Jaintia Fresh Vegetable Suppliers Association, ka kynhun ki pulit ka Special Cell ha ka 6 tarik mynta u bnai ki la pynlong ka jingthwet ha kaba ki la ioh ban kem noh ia laingut ki briew na ka thain Mawlai By Pass hadien ba ki la ialam ia uwei u nongniah trok na Lad Smit bad pynbor ia u ba un phone sha u trai na ka bynta ban siew ia ka pisa.

Kane ka kynhun ka la leh ia kane ka juh ka kam pyntriem la bunsien ha kaba la kyntu ruh ban ujor da ka FIR ia kaba la dep ban rejistar.

Mynta kane ka kynhun pulit ka dang pynlong ka jingthwet ban ioh kem ia kiwei pat ki dkhot jong kane ka kynhun runar kiba dang don hapdeng ka jingphet rieh.

Na kine ki briew la ioh ban kurup noh sawtylli ki mobile phone bad kawei ka kali Maruti Swift Dzire. Ia ka jingdonkti jong ki ha kiwei pat ki kam pyntriem ym pat lah ban tip thikna ia mynta hi.

Halor kane la rejistar case pyrshah ia kine ki runar hapoh ki kyndon bapher bapher jong ka IP hapoh Madanrting PS bad ka jingtohkit ka dang iaid shakhmat.