Ha u Lber 2025 yn pyndep noh ia ka skhim sam um GSWSS phase III

Syllad | The Rising MeghalayaSeptember 1, 2024

Ia ka skhim sam um Greater Shillong Water Supply Scheme (GSWSS) Phase-III la khmih lynti ba yn lah ban pyndep noh ha u bnai Lber jong u snem ban wan.

“U bnai bad snem uba la khmih lynti ban lah ban pyndep noh ia ka skhim sam um GSWSS Phase-III la khmih lynti ba kan long ha u  Lber 2025,” ong u Myntri ka Tnad PHE u Marcuise N Marak haba jubab ia ka jingkylli ba la wanrah ha kaba kut noh jong ka Dorbar Synrai jong ka Iingdorbar thaw ain ha ka 30 tarik mynta u bnai.

U Myntri u la ong ba ki daw jong ka jingslem ban pyntreikam ia kane ka project ka long namar ka jingtyrkhong pisa, ki jingeh ha ka jingiatreilang hapdeng ki tnad treikam, ka jingeh ban ioh jingbit na ka bynta ban pyniaid ia ki pipeline na ka PWD bad  NHIDCL,  ka jingslem ha ka kam ban buh ïa ki network namar ka jingpyrshah na ka PWD, ka jingslem ban ioh ia ka jingbit na ka tnat Forest, ka jingslem ban aijingbit da ka Ministry of Defence bad ka jingpynslem ban ai NOC da ka Hima Mawphlang na ka bynta ki jaka ba donkam ban shna ia ka stage II pumping.