Ha u MP Shillong pynsngew ka Dorbar Shnong Mukroh Pyllun halor ka jingshah siat iap ki 5 ngut; khlem urlong ka BOP

Syllad | The Rising MeghalayaAugust 17, 2024

Ka Dorbar Shnong Mukroh pyllun haka 17 tarik Nailar kala aiti iaka dorkhas ha u MP Shillong Parliamentary Seat u Dr Ricky AJ Syngkon ban pynpaw iaka jingeh ka shnong Mukroh kaba don ha khappud Assam Meghalaya bad ka jingshah pyndik ha ki briew sorkar ka Assam.

Katkum ka dorkhas kaba la aiti ha u MP ka Shillong, ka dorbar shnong Mukroh Pyllun kala kyrpad ia u MP ban shimkhia ban peit iaka kam pynbeit pud bad ka Assam bad ban shna Border Police Out Post ha Mukroh bad ka community hall bad ka ophis shnong.

Haka dorkhas kaba la ai da u waheh shnong Dorbar shnong Mukroh Pyllun Kitlang Maskut bad Secretary Dorbar Shnong Mukroh Pyllun u Precious Sten la ong: “Ka shnong jong ngi ka dei kawei na ki shnong ha ka jylla Meghalaya jong ngi kaba mat shibun ki jingeh ha kaba iadei bad ki kam khajia khappud bad ka jylla Assam. Kum shu pynkynmaw ia ka jingjia kaba sngewsih kthang bad ka ba ym lah shuh ban klet ia ka jingjia jong ka 22.11.2022 ha kaba ngi la duh ei ia ki mynsiem ba lui lui jong ki san (5) ngut ki nongshong shnong ha ki kuli jong ki bor ka Assam bad haduh mynta ka jingbishar halor kane ka jingjia ka dang jar jar.

Ngi kwah ruh ban kdew hangne ba katkum ka map jong ka Dorbar Shnong ba la ai da ka Jaintia Hills Autonomous District Council (JHADC), Meghalaya, u boundary line jong ka shnong kan dei haduh Mootha Siangkwai lane Umsapar kaba don haduh 8Km na pdeng jong ka shnong (Phlong) bad ha shilynter kine ki jaka ki nongshong shnong ki ia rep ia riang bad bun ki pyntha kba jong ki nongshong shnong ki don ha kine ki jaka bad baroh kine ki jaka ki dei jong ki nongshong shnong.

Hynrei, haduh mynta ki briew jong ka sorkar Assam lyngba ki Police jong ka kiba don ha Mookoilum, Kherini bad ki forest guard ba don ha ka ktem jong ki ba la shna jubor da ka Assam ha Khliehsanaro kaba dei ka jaka hapoh u pud jong ka shnong ki pyndik bad pyntieng pynsmiej ia ki nongshong shnong kiba leit trei bad rep sha kine ki jaka bad haman ba ki nongrep jong ngi ki kit ia ka dieng iap ban thang dieng (fire wood) bad ki phlang ban tap iing, kine ki briew jong ka Assam ki khang bad ki shait dain ia ka kuna ka baheh.”

Ka Dorbar Shnong Mukroh Pyllun kala kdew ruh ba watla ka sorkar jylla kala kular ban buh ia ka BOP ha Mukroh, hynrei haduh mynta kam don satia kino kino ki dak ki shin ban pynieng ia ka BOP.

Mynta ki police ba ap pahara ha ka jaka ba jia ka jingshahsiat bad kyllon iap ki san ngut kynthup uwei u forest guard ka Assam, ki shu shong tang ha ki iing ba shu shna tang malu mala bad haduh mynta.

Ka Dorbar Shnong Mukroh Pyllun kala kyntu ruh ia u MP ban shimkhia halor kane bynta khnang ban shngain ki nongshong shnong. Ka dorbar kala kyrpad ruh ia u MP ban theh iaki lad jingiarap lyngba ka skim MP ban tpynioh Community Hall bad ka ophis jong ka dorbar shnong ban suk haba pynlong ia kino ki jingialang.

Kyllon iap 5 ngut haka jingshah siat pathar haki forest guard ka Assam ha Mukroh