Ha u Nohprah yn rah ka Sorkar Pdeng ban iakren halor ka jingpynkylla ia ka Sixth Schedule

Syllad | The Rising MeghalayaSeptember 23, 2024

Ka Sorkar Pdeng ka lah ban rah ia ka jingtyrwa ban pynkylla noh ia ki kyndon jong ka Sixth Schedule jong ka Riti synshar Ri hapoh ka Iingdorbar thaw Ain jong ka ri ha u bnai Nohprah u ban wan.

Ia kane la pyntip da u Convener jong ki 10 tylli ki Autonomous District Council (ADC) na ka thain Shatei Lammihngi bad u Chief Executive Member ka KHADC u Bah Pyniaid Sing Syiem hadien ka jingwan iakynduh ia u Adviser jong ka Ministry of Home Affairs, Government of India, NE Region u AK Mishra ha ka Nongbah Delhi ha ka 21 tarik u Nailur.

“Hadien ka jingiakynduh, ngi sngewthuh shai ba ka Sorkar India kan rah ia ka 125th Constitutional Amendment kaba kynthup ia ka Sixth Schedule jong ka Riti synshar Ri hapoh ka Iingdorbar jong ka ri ha u bnai Nohprah u ban wan,” ong u Bah Pyniaid.

“Ngi ai khublei ia ka MHA kaba la pynsngap ia ki jingai jingmut jong baroh ki 10 tylli ki ADC, u la ong da kaba bynrap, “Ngi la kren shai ba ngim lah ban iapein bad ki jingdawa ki jong ngi khamtam ha kaba iadei bad ka jinglong ba kyrpang ka jong ngi, ki riti dustur tynrai bad ki jingleh jingkam tynrai. Ngi kwah ban pynthikna ba ka jingpynkylla kam dei ban pynduh pat ia ka jingthmu jong ka jinglong kyrpang jong ka jaidbynriew.”

U CEM ka KHADC u la ong ruh ba u Adviser ka MHA u la pyntip ba na ka liang ka Sorkar Pdeng kan ialeh ban wanrah ia kata ka jingkylla kaba long kyrpang ha kiba bun ki kolshor bad ki riewlum jong ka thain Shatei Lammihngi jong ka ri khamtam kiba don hapoh jong ka Sixth Schedule.