Ha u Risaw yn bteng ka jingiakren pynbeit pud hapdeng ki CM ka Meghalaya bad Assam

Syllad | The Rising MeghalayaSeptember 5, 2024

U Myntri Rangbah ka Jylla u Conrad K Sangma bad Myntri Rangbah ka Assam u Himanta Biswa Sarma ki lah ban bteng biang ia ka jingiakren pynbeit pud ha ka wat kaba ar ha u bnai Risaw u ban wan, kata ban ia pynbeit noh ia ki hynriew tylli ki jaka kiba don hapdeng ka jingiakajia kiba dang sahteng.

Haba kren sha ki lad pathai khubor haka 4 tarik Nailur, u Conrad u la ong ba u la iakren ia kane ka kam bad u CM ka Assam ha ka jingiakynduh bam ja miet naduh kine ki lai taiew ne shi bnai mynta.

U Conrad u la ong, “Ngi la ia rai lang ba kaba kloi eh la khmih lynti ba kan long ha u bnai Risaw u ban wan ba ngin lah ban pynlong biang ia ka jingialang ha ka wat kaba ar ban iakren halor kane ka kam.”

Haba pynpaw ba ka wat kaba ar ka dei kaba kham shem shitom ban lah ban pynbeit, u CM u la ong,” Namar kata ngi la long kiba phikir bha haba ngi iaid shakhmat kum sha ka thain Langpih, Psiar, Khanduli, Block I bad II, namar ngi sngewthuh ba ki don shibun ki jyrwit jyrwat. Ka dei satia kaba suk kum ha ka wat kaba la dep.

“Kumta ruh watla ka jingangnud bad ka jingthmu ka long kaba skhem kumba long ha ka wat kaba nyngkong, hynrei namar ka jinglong jingman jong kine ki jaka ngi kwah ban long kiba phikir bha haba ngi jam shakhmat khnang ba ngin lah ban pynbeit ha ka rukom kaba dei bad ka lynti ka ban pdiang lang da baroh,” bynrap u CM.

Lah ban kdew ba ka wat kaba nyngkong jong ka jingiakren ia pynbeit halor ki kam iakajia pud kaba ar hapdeng ka Meghalaya bad Assam, kala long ha u bnai Jymmang, 2023.