Ha u tyllai phasi lap iaka met u Dolloi Nartiang

Syllad | The Rising MeghalayaJanuary 3, 2021

U Dolloi ka Elaka Nartiang Hepsing Dhar, uba shah kynnoh ban lehbeijot ïa kawei ka longkmie ha kawei ka shnong kaba hap ha Nartiang Police Station, West Jaintia Hills District la lap iaka met jong u ha u tyllai phasi na ka kawei ka jaka khlaw haka step Sngi U Blei.

Ka khubor kaba iohlum ba haka step Sngi U Blei, ki katto katne ki briew kila la lap ïaka metiap kaba la sdien ha u tyllai phasi ha kawei ka jaka khlaw kaba hap ha khappud ka Moopliang bad ka Wahiajer.

Mar mar la pyntip sha ki Pulit bad kila leit ban shimti iaka ka met bad la pynthikna ba ka dei ka metiap u Hepsing Dhar, Dolloi Nartiang.

U Superintendent of Police, West Jaintia Hills District u Bikram D Marak, ula iathuh ba la wan da ka kynhun jong ka Forensic Science Laboratory Meghalaya ban leh iaka jingtohkit bad kiwei ki jingdonkam jong ka aiñ ban pynthikna iaka jingiap.

Kumban shu pynkynmaw ha u bnai Naiwieng 30, 2020 u Dolloi Nartiang ula shah kynnoh ba ula lehbeijot ia kawei ka longkmie.

La kynnoh ba une u Dolloi uba dei u kobiraij ne u nongai dawai kynbat ula wan haka longiing katei ka longkmie ban ai ‘nasib’ katkum ka jingngeit jong ki ban beh iaka sniew ka smeh naka iing ka sem jong ki. Hynrei ula shah kynnoh ba u leh pynban da katei ka kam sang pyrshah iaki kynthei ki khynnah.

Une u Dolloi Nartiang ula shah set phatok teng halor ka jingshah kynnoh ban leh beijot iaka longkmie kaba wan shim dawai ha u snem 2018 bad ka don ruh kawei pat ka mukotduma halor ka kam thombor ia kawei ka theilud kaba ula shah pyngngat hapoh ka kyndon aiñ POCSO.