Haba wan ka eriong haka jingim, ka iarap ban long u nongiakhun uba jop: Ardent

Syllad | The Rising MeghalayaJanuary 13, 2024

Wat sngewtynnad ba phin ioh tang ka jingim kaba suk, kaba jaijai, ka bym don ka eriong, sngewtynnad haba wan ki eriong haka jingim, namar ka iarap ban long u nongiakhun uba jop.

Ia kane la ong u President ka Voice of the People Party (VPP) u Bah Ardent Miller Basaiawmoit uba dei ruh u MLA ka Nongkren Constituency haka 12 tarik Kyllalyngkot haba wan aimynsiem bad kitbok kitrwiang iaki 61 ngut ki samla shynrang kynthei kiba la pyndep iaka jinghikai ban long nongap pahara ne Security Guard haka shlem Sub Center Tornado Security Agency kaba dei trai da u Bah Pyndaplang Muksor kaba don haka Shnong Umdeinlin, West Jaintia Hills District.

Bun napdeng jong ngi, ngi shaniah beit tang haka kam sorkar, ngi sngew ba lada ym ioh kam sorkar ym don da kawei pat ka kam, hynrei une u samla rangbah u pyni da kaba kam da kaba u iehnoh iaka kam sorkar ban sdang pat da kane ka kam ymdei tang ban im ialade hynrei ban thaw kam ruh ia kiwei, la ong u Bah Ardent.

Shuh shuh ula ong, ban seng iaka shlem hikai hap ban mad shibun ki jingeh, khamtam ha kine ki sngi, kiba kata ka jingiakhun, ka jingiaksaid ban ioh iala ki kam ka la long kaba shyrkhei kat haduh ban hap ban iaknieh.

“Ngi ki nongialam ka VPP ngi wan ban aimynsiem lem bad ruh kaei kaba ngi lah ban leh ngin leh, hynrei ngim wan pat ban kular namar ngim dei ki nongialam kiba sngewtynnad ban kular.’, ong u Bah Ardent.

Nalorkata ula kyntu ruh iaki samla da kaba ong “Wat ai ba ki jingeh kiba iakynduh haki 45 sngi kin pynlong ia phi ban phai dien noh, dei ban don ka mynsiem satar bad lehrain ban ieh ia kano kano ka kam shiteng lynti”.

Ha kaba iadei bad ka synshar khaddar u iathuh, ba la sdang iaka jingialap ban wanrah iaka synshar khaddar kaba khuid naduh u 2010. Ki don shibun ki jingkynthoh jingkren hynrei ngim pynsngap ngi iaid shakhmat bad kumba long mynta sngewtynnad ba ki paidbah kylleng ka Jylla ki sdang sngewthuh ia kata ka jingmyntoi kaba kin ioh lyngba ka synshar khaddar kaba khuid.

“Ngim ju sngap iaka jingpynrem, jingkren bein jong ki briew hynrei ngi sngewthuh kaei kaba ngi leh kadei na ka bynta ka bit ka biang bad ka jingmyntoi jong ki longdien mandien kumjuh ki hep barit kiba long ki persara jong ka jaitbynriew.” ong u Bah Ardent.

Ula kyntu ruh ba kajuh ka rukom pyrkhat kadei ruh ban rung haki 61 ngut ki samla bad haba iakynduh jingeh haka jingim wat sngew ba dei tang phi kiba iakynduh jingeh. Haba mad iaki jingeh ka pynmih iaka mynsiem iakhun bad long nongjop.