Hadien 22 snem shah rai pynrem u nongleh beijot ha West Jaintia Hills

Syllad | The Rising MeghalayaSeptember 4, 2023

Hadien 22 snem kynthih, ka lanot kaba la ngat ha ka jingshah leh beijot ha West Jaintia Hills District ha kaba khatduh ka la ioh ia ka jingbishar hok, kata hadien ba ka la ngat ha ka jingshah leh beijot ha ka por ba ka dang dei tang ka khynnah rit kaba la jia ha ka 23 tarik u Jymmang 2001.

Na ka liang u Superintendent of Police ka West Jaintia Hills, Jowai u la ong ba ha ka 26 tarik u Jymmang 2001 la ujor FIR ha u Officer In-Charge ka Jowai Police Station pyrshah ia uwei u briew uba kyrteng u Dri Phawa uba dei na ka shnong Myrjai halor ka jingdonkti ha kaba leh beijot ia kawei ka khynnah kaba la jia ha ka 23 tarik u Jymmang 2001.

Hadien la rejistar case hapoh Jowai Police Station, kata katkum ka Jowai PS Case No. 45(5)2001 U/s 376 IPC bad la pynlong ia ka jingtohkit halor kane ka jingjia hapoh ka jingialam jong u ASI W. Vaichei.

Hadien ka jingtohkit, na ka liang u IO uba khmih ia kane ka case u la pynngat kyndon pyrshah ia une u briew uba la shah kynnoh donkti hapoh ki kyndon jong ka U/s 376 IPC.

Na ka liang u heh pulit u la ong ba ha ka 31 tarik u Nailar mynta u snem, ka kashari jong u Sessions Judge, West Jaintia Hills, District Jowai ka la lap ia ka jingdonkti jong u Dri Phawa ha katei ka kam bymman hapoh ki kyndon jong ka U/s 376 IPC bad rai pynrem da kaba set phatok 10 snem kynthih.