Hadien 3 snem pynkhie im biang ka Apphira Archery Committee ia ka Rongbiria ka bri hynñiewtrep

Syllad | The Rising MeghalayaApril 4, 2024

Ka Apphira Archery Committee mynta ka sngi ka la shim pat ia ka sien jam kaba 31 ba kan pynlong ia ka iakob siat khnam ba tip ia ka kum ka Rongbiria Ki Hima Ka Ri Hynniewtrep, ia kaba la pynlong ia ka ha madan 2nd Ground, Polo, Shillong ia kaba la iarap ban kyrshan ia ka da ka Centre Point Group of Entrepreneur (CPGE), bad ka sien ba nyngkong eh ba la pynlong ia kane ka jingiakob siat khnam ka dei ha ka 4 tarik u nai Iaiong jong u snem 1990.

Ban sot na ka jingkren maitphang u Rgh Paia B Synrem, u pyntip ba naduh u snem 2020 haduh u snem 2023, ka committee kam shym la lah ba kan pynlong ia kane ka jingiakob hadien ba ar snem la lap ba wan ban lyngshop noh ka khlam kangoh Covid 19 bad ha ka juh ka por kaba u Rangbah Sumar Singh Sawian  (bam kwai ha dwar u Blei) um shym la don hapdeng kamet kaba koit ba khlain tad haduh ka sngi ba un da khlad noh na kane ka sla pyrthei.

Hynrei kiba bun na ki riew Rangbah kiba la juh sakhi ia kane ka rongbiria naduh ka por u Rgh Sumar ki la leit ban pynsngew khamtam ha u Chairman u Rgh Wanllamphang Roy ba donkam ban pynkhie  im beit ia kane.

Shuh shuh u Rgh Paia u la ieng ruh ban pynkynmaw ba balei ba ka committee kjala jied ia kum kane ka sngi ka 4 tarik u nai Iaiong ban pynlong ia kane ka rongbiria jong ki hima ka ri hynniewtrep,  ka long ba kane ka sngi ka don ia katta ka bynta kaba kongsan ha ka history jong kane ka jaidbynriew, namar ba dei ha kum kane ka sngi jong ka 4 tarik u Iaiong 1829 ba u Pa’iemTirot Sing Stiem, u Syiem ka Hima Nongkhlaw u la ieng ban ialeh pyrshah ia ka jingthombor  ka synshar nongwei ha kito ki por  kaba dei ka East India Company.

Shuh shuh u la ieng ruh ban pynkynmaw biang ha kane ka sngi ba ka thong jong kane ka committee ruh ka long ba kumba la iatip ba ka ri Khasi kaba dap kaba donm ia la ki jong ki Hima ki Elaka bad Sirdarship bapher bapher naduh na ri lum Khasi shaduh ka ri lum Pnar ba kynthup ruh naduh ki Doloi, ki Syiem bad ki nongsynshar trai ri trai muluk ba synshar ha la ki jong ki it ki hima.

Katba na ka liang u Pa’iem Ainam Manik Syiem, Syiem ka Hima Mylliem ha ka jingkren kum u kongsan u la pynpaw ba kumba ia tip ba ka rongbiria u Khasi ka dei kaba la sdang naduh ki por u kulong kumah ha kaba la ai sngewbha da katta ka ‘Meikha’ sha ki khun ki khun jien jong u lum ‘Ka Meikha’ kaba la tip mynta kum u lum Kamakhya hapoh ri thor jong ka Assam.

U Pa’iem Ainam u la bynrap ba la ai sngewbha sha ki khun ki hajar jong ka ri ki Hynniewtrep Hynniewskum ban pynneh pynsah ia kane ka rongbiria.

U Pai’em Ainam um lah ban khlem da ai khublei ia u Rgh Sumar Sing Sawian (bam kwai ha dwar u Blei) namar ka jingiohi jngai ka jong u, uba la lah ban pynlong ia kane ka rongbiria da kaba u la lum lang  ia baroh ki Hima Khasi .

Ha shwa ban pyntyllun shakhmat ia kane ka rongbiria, ka la don ruh ka nguh ka dem kaba la pyndep da u Riew Tymmen Riewsan u Rgh Skor Jala.

Ki riew pawkhmat kiba la wan ban sakhi ia kane ka jingplie ia ka rongbiria ka kynthup naduh u President bad General Secretary ka Seng Khasi Kmie u Rgh O. Pyngrope bad u Rgh Hainess Marbaniang, nangta u bah Danny Pariat ba dei u nongialam  jong ka kynhun ka SRGT, la sakhi lang ruh da u President jong ka Seng Khasi Mawlai, Seng Khasi  Ri Riad Laban bad Seng Khasi Pynthor, ki nongkit kam ka Apphira Archery Committee bad khamtam eh ki rangbiria kiba la wan  na kylleng sawdong jong ki it ki hima ka bri u hynniewtrep.