Hadien 34 snem iatylli biang ka Great Society ban shim bynta ha ka Cherry Blossom

Syllad | The Rising MeghalayaNovember 15, 2024

Ka 15 tarik u Naiwieng kan dei ka sngi ka ban sah jingkynmaw hadien ba ka kynhun tem The Great Society – kaba pawnam bad kaba la rim jong ka nongbah Shillong sa shisien pat ka la iatylli biang kum ka kynhun hadien 34 snem ban iashim bynta ha ka Concert ka ban sah jingkynmaw ha ka tamasa Cherry Blossom.

Kane ka kynhun tem ka kynthup ia u Bah Lou Majaw, Rudy Wallang, Ferdy Dkhar bad Keith Wallang, kiba la pynkhreh ban pynshongshit bad ban pynsah kynmaw ia ki paidbah kiba wan iashim bynta ha katei ka tamasa.

Kane ka kynhun tem kaba la sdang ia ka tem ka put ha ka nongbah Shillong ka la kylla long ruh ka nongai mynsiem ia kiba bun kiwei pat ki nongrwai bad nongtem ha kylleng ka ri India bad shabar kumjuh. Kane ka kynhun tem ka dei ruh kaba la ioh ban rung ha man la ki thliew iing bad kaba la ioh ruh ia ka jingieit na ki paidbah ha kitei ki snem kiba la leit noh.

Ka jingiakynduh biang jong kane ka kynhun ka kham khraw ban ia ka concert namar ka dei ka jingleh kmen na ka bynta kine ki riew pawkhmat kiba la prat lynti ban kyntiew ha ka liang ka put ka tem ha ka nongbah Shillong. Kumta ruh ki paidbah nongkyrshan kiba rim bad kiba thymmai kin ym kwah ban duh ia ka kabu ban sakhi ia kane ka kynhun tem ha katei ka tamasa kaba heh.