Hadien 45 snem pynkhie im biang ka JHADC ia ka Elaka Labang Nongphyllut

Syllad | The Rising MeghalayaNovember 10, 2023

Hadien 45 snem ka Executive Committee jong ka Jaintia Hills Autonomous District Council (JHADC), hapoh ka jingialam u Ma Thombor Shiwat ka la shim ia ka sienjam ban pynkhie im biang iaka Elaka Labang Nongphyllut da ka thung shwa ia u Acting Dolloi na bynta kane ka Elaka kaba kdup ia ki shnong Pnar hapoh Block -I.

Ia kane la ong u Chief Executive Member ka JHADC Ma Thombor Shiwat haka dorbar tlang kaba long haka 9 tarik Naiwieng, haba jubab iaka jingkylli kaba la wanrah da u Ma Awhai Andrew Shullai ha kaba iadei bad ka nongrim baka konsil ka ieng halor u pud u sam ka Jylla bad ka Assam.

Ka Executive Committee JHADC katkum ka notification no.JHADC/POL/23/2021/6 tarik 8/11/2023 hapoh ka kyndon ain katkum ka section 14(1) jong ka Jaintia Hills District (Establishment of Elaka and Village and Election Appointment, Powers, Functions and Jurisdiction of Dolloi/Sirdar and Waheh Shnong) Act, 2015, ka la thung ia u Prolin Samayang kum u Acting Dolloi jong ka Elaka Labang Nongphyllut. Ka konsil kala pynkup bor bad iktiar ban treikam kum u Acting Dolloi jong ka Elaka Labang Nongphyllut tad haduh bala pynbna da kumwei.

U Dolloi uba pura bad u khatduh jong ka Elaka Labang Nongphyllut u dei u Ma Honriwell Pyrphet bad la thung ia u ha ki snem 1960 bad u la khlad noh na kane ka sla pyrthei kumba 40 snem tam eiei. Hynrei ha ka por jinglong Dolloi jong u ki bor pyniaid jong ka Karbi Anglong Autonomous Council ne ka KAAC kim treh satia ban ithuh ia ka bor jong u namar kim don satia kata ka jingsynshar Dolloi.

Haba pynshai ha iing dorbar, u ma Thombor Shiwat u la iathuh ba ka Sorkar Jylla ka la pan ia ka jingsngew bad jingshem jong ka JHADC halor ki jaka iakajia khappud bad ka Assam. U la iathuh ba ka Executive Committee ka la dep ai jubab sha ka Sorkar Jylla ba ki shnong pnar ha khappud ki dei ban neh ban sah hapoh Meghalaya bad kumjuh ruh ia ki shnong Pnar hapoh Elaka Labang Nongphyllut ki dei ban wanphai noh sha Meghalaya.

U Ma Thombor ula ong ruh ba pud ka sam jong ka shnong Lapangap kam long kaba shai bad dei kane kaba la wanrah iaka jingiakajia ha Lapangap. U la ong ruh ba tang ka shnong Mukroh kaba don ia ka map bad ka jingkdew kaba shai ia ka pud u sam jong ka Shnong.

U Ma Thombor ula ong ba kiwei pat ki shnong kiba don ha khappud kum ka Khanduli, Lapangap, Moolaber, Psiar bad Khatkasla kim don satia ka map shnong kaba kdew ia ka pud u sam jong ki shnong.

Shuwa kane u Executive Member Ma Fineliness Bareh u la iathuh ba ka Shnong Khanduli kaba hap hapoh ka Elaka Nongjngi, ka Lapangap, Mukroh kiba hap haka Elaka Shilliang Myntang, ka Moolaber bad Khatkasla kumjuh ka Psiar kiba hap hapoh ka Elaka Raliang. Baroh kine ki shnong ki long hapoh u pud u sam ba pura jong ka JHADC bad Meghalaya bad ka Assam ka iai pyrshang na ka por sha ka por ban kyntur jaka sha kine ki Shnong.

Ha kane ka dorbar kaba shisngi, u Chief Executive Member ka JHADC Ma Thombor Shiwat ula wanrah iaka report ha kaba iadei bad ka jingpynbeit ia ki katto katne ki bynta jong ka Jaintia Hills Autonomous District (Village and Town Development Council) Bills 2023.

Kane ka Village and Town Development Council ka dei kaba la mynjur da ka konsil haka dorbar kyrpang kaba long haka 20 tarik Jylliew 2023, hynrei na ka liang ka District Council Affairs kala pynphai biang ia kane ka bill hadien ba ka State Law Department kala lap ba donkam ban pynbeit ia ki katto katne ki section bad ki kyntien shuwa ban phah sha u Lat ka Jylla ban ioh iaka muhor jong u ban pynlong ain iaka.

Kane ka bill ka dei na ka bynta ban tehsong iaki shnong ki thaw bad kin don hapoh ka jingpeit ka konsil. Ka jingtreikam kane ka bill kan long beit thik iaki kam pynroi shnong ki thaw bad ka por treikam kane ka council ka long kam dei ban duna iaka 1 snem lane 3 snem. Ki dkhot ka council kim dei ban long kiba trei hapoh District Council, MLA, MP, MDC lane ki nongtrei hapoh ki tnad sorkar.

La pynwai iaka dorbar da ka jingkynmaw burom ia (L) Tobias Manar MDC barim.