Hadien 6 snem ba la khangdam pynbna ka sorkar ban plie noh ia ka surok ha Them Metor
Ka Deputy Commissioner ka East Khasi Hills, ka Kong RM Kurbah ha ka 30 tarik u Risaw ka la pynbna ban plie noh ia ka leit ka wan jong ki kali na ka surok Them Metor kaba pyniasoh ia ka Iewmawlong sha Bimola naduh ka 4 tarik u Naiwieng u ban wan, kata hadien 6 snem ba la khang khyrdep.
La khangdam noh ia kane ka surok na ka bynta ki kali naduh u bnai Jymmang 2018, kata hadien ba ka la mih ka jingiakhih pyrshah ia ki jaidbynriew Harijan kiba shong ba sah ha Them Metor hadien ka jingjia shah thombor jong ki arngut ki khun jong ki nongniah bus saw tang namar ka jingkah lynti ka bus saw ia kawei ka kynthei Harijan kaba dang rah um.
Kane ka jingjia ka la pynmih ruh ia ka jingiakynad kaba jur hapdeng ki pulit bad ki paidbah kiba thmu ban leit thombor hapoh Them Metor bad kaba la neh kumba katto katne taiew.
Ka jingpynmih ia kane ka hukum ka long ruh khnang ban lah ban weng noh ia ka jingeh kaba iadei bad ka jingdheng kali kaba jur ha ka thain Iewduh namar ka jingkhang dam ia kane ka surok kaba don hapdeng jong ka nongbah.
Ka Deputy Commissioner ka pyntip ba ba ia ka No Entry na Iew Mawlong sha lad Bimola la weng noh naduh ka 4 tarik u Naiwieng tang naduh ka por 8 baje mynstep haduh 4 baje janmiet. La pyntip ruh ba ia kane ka surok la pynkylla sha ka ‘One Way’ bad ka ‘No Entry’ na Iew Mawlong sha Motphran.
La pyntip ruh ba ia ki katto katne ki bos ba pynieng ha Iew Mawlong hajan Traffic Point yn pynkynriah noh sha MUDA Parking lot pyrshah ka Anjalee Cinema Hall.
La khang ia baroh ki bus SPTS ba kin iaid sha Iew Mawlong na Motphran hynrei kin hap ban iaid beit sha Stand Jeep bad mih shapoh District Council.
Facebook
Instagram
Youtube
Twitter
Leave a Reply