Hadien 68 snem bala im syrtok u paidbah, la wan buh maw nongrim u Bah Prestone iaka surok Borkhat Sonapur

Syllad | The Rising MeghalayaNovember 16, 2022

Hadien 50 snem ba ka jylla kala ioh iaka jylla kaba pura, pynban ka paidbah jong ka shnong Huroi, Hingaria, Lejri bad Lahalein dang mynta kin ioh noh iaka surok kaba paka, kaba baroh shi katta ki hap ban iaid tang haka surok khlaw.

Kane ka surok kaba pyniasoh sha kitei ki shnong ka dei kaba la tip kum ka Borkhat Sonapur ka jngai 39.594 Kilometre kaban shna haka jinglut kaba 126 klur kaba bei pisa da ka North East Road Sector Development Scheme (NERSDS).

Kine ki shnong ki ba don ha khappud India Bangladesh ha East Jaintia Hills District kila seng naduh ba ka jylla ka dang hap hapoh ka Assam katta naduh u snem 1954, hynrei hadien bun phew tylli ki snem ba kine ki shnong ki im hapdeng jingim kaba syrtok ban iaid ban ieng haka surok kaba khohruh khohram, mynta kin ioh iaka surok kaba paka.

U Deputy Chief Minister ka Jylla uba dei khmih iaka PWD, u Bah Prestone Tynsong ula plie paidbah ia u maw nongrim ban sdang shna iaka surok haka shnong Huroi haka sngi Balang.

Laiadonlang u MLA ka thain ma Shitlang Pale, u Dc East Jaintia Hills u Abhilash Baranwal, MLA barim u Hopeful bamon, MDC JHADC kiba kynthup ua u ma Emlangky Lamare, Seibor Shadap, Dr Sanky Shangpung bad ka kong Santa Mary Shylla, Nehlang lyngdoh nalor kiwei kiwei.

Uma Kynjaimon Amse, u muktiar bad u ba long u Adviser jong ka Joint action committee ka Huroi, Hingaria, Lahalein bad ka Lejri ula ong ba ka jingshna iaka surok kan pynjem iaka jingeh kine ki saw tylli ki shnong kiba la im hapdeng jingim ka jingsyrtok da ki phew tylli ki snem.

Ula ong ba ki paidbah ka thain kila pynpaw iaka jingkmen ba ka jingdawa kaba la slem bha jong ki ban ioh iaka surok kala urlong bad ki kyrmen ruh ba kane ka surok kan dep kloi katkum ka por bala buh.

Ha kane ka juh ka sngi u Bah Prestone ula plie ruh ia mot sahnam ki nongseng shnong ne ki kpa tymmen jong ka shnong Huroi.