Hadien 7 snem la plie paidbah iaka jingkieng doi doi haka shnong Ialong

Syllad | The Rising MeghalayaSeptember 9, 2023

U MLA jong ka Jowai, u Wailadmiki Shylla ula plie paidbah iaka jingkieng doi doi ne ka Suspension Bridge ban kam shilliang iaka Wah Myntdu haka shnong Ialong haka sngi Saitjain.

Kane ka jingkieng ka dei kaba la sdang trei naduh u snem 2016 bad kala neh sah khlem pyndep haduh 5 bad kala kynjoh da ki phew lak ban shna iaka.

U BDO ka Thadlaskeiñ C&RD Block u Dr. Brightstar Langbang ula iathuh ka jinglut jingsep ban tei ia kane ka jingkieng ka dei lyngba ka skhim Mahatma Gandhi National Rural Employment Guarantee Act jong u snem 2015-2016 kaba la kot 45 lak 50 hajar tyngka, na ka MBDA kumba 16 lak 25 hajar tyngka, MP skhim 8 lak tyngka, na ka skim Chief Minister 10 lak tyngka bad na u synniang shnong 3 lak 25 hajar tyngka.

Kane ka jingkieng ka ban kam sha shilliang ka wah Myntdu ka don haka jaka kaba la tip kum ka Um-Dalong kaba ka shnong Ialong kala pynkylla kum ka Fish Sanctuary.

U Waheh Shnong Ialong u T. Ram Phawa haka jingkren ula ong kane ka jingkieng dei kaba la sahteng naduh u snem 2016 bad hadien ka jingshimti jong ka Executive Committee kaba thymmai haka jingialam jong u, kum u Waheh Shnong la sdang biang ban pyntrei ïaka ha u snem 2021 haka jinglut kaba 65 lak tyngka.

Ula ong ka jinglah ban pyndep ia kane ka jingkieng kan kyrkhu ymtang iaki nongshong Shnong bad nongrep hynrei ka long ruh ka jingmyntoi iaki nongshong Shnong ha kaba iadei bad ka kam jngohkai pyrthei.

U Wailadmiki Shylla haka jingkren ula iaroh iaki nongialam Shnong bad ia baroh ki nongshong ka Ialong kiba don ka mynsiem iatreilang na bynta ka bha ka miat bad ka roi ka par jong ka shnong.

U MLA ula pynsngew ruh iaka jingkular jong u Myntri rangbah ka Jylla u Conrad K. Sangma ban sanction kumba 20 klur tyngka na ka bynta ban pynbha pynmiat iaki surok, ki lynti synkieng bad ban pynlong iaka Shnong Ialong kum ka Model Village ha kine ki 5 snem ban wan.

Ha kane ka sngi la iadonlang u u MDC u EM ka JHADC u Phasmoon Dkhar kum u symbud kongsan, u FB Basan MCS Project Director DRDA, u S Phanbuh MCS, Sywell Lyngdoh DPM Basin, ki nongshong shnong bad kiwei de.

Ïaka jingialang plie paidbah la pynïaid da u Masan War Secretary Shnong Ïalong bad la ioh ki kyntien pdiang na ka Kong Shimti Pale bad la pynphuh pynphieng iaka jingialang da ki jingshad na ki longkmie, ki khun samla bad ki hep barit jong ka Dorbar Shnong Ïalong.