Hadien 90 snem ioh ïing dorbar ka shnong Nongkhroh, kular u ma Sniawbhalang ban shna iaka surok bad tei pynheh iaka skul

Syllad | The Rising MeghalayaJanuary 18, 2025

U Symbud Myntri Rangbah ka Jylla bad MLA ka thain Ma Sniawbhalang Dhar ula kular ban pynioh jingiarap kumba 3 klur tyngka na ka bynta ban shna iaka surok Nongkhroh kaba jngai 5 KM bad 10 lak tyngka ban tei pynheh iaka Upper Primary School, Nongkhroh kaba la kyntiew kyrdan mynta shaka Secondary School.

U Ma Sniawbhalang Dhar ula kular ia kane haba u wan ban plie paidbah iaka Community Hall jong ka shnong Nongkhroh, West Jaintia Hills haka jingdonlang u MDC ka thaiñ Ma Jesse Suiam haka 17 tarik Kyllalyngkot.

U Ma Sniawbhalang Dhar haka jingkren ula ong, kan long ka sngi sah kynmaw iaki nongshong shnong namar hadien 90 tylli ki snem ka shnong Nongkhroh kala ioh iaka iing Dorbar kaba paka.

“Ngam shym la mutdur ba ka shnong Nongkhroh hapoh ka jingialam jong u Waheh Shnong kan ioh kat kane ka iing dorbar kaba itynad hynrei kane baroh ka urlong dei namar ka jingpyndonkam hok, ka jingiatreilang bad jingiatylli jong ki nongshong shnong khamtam ki nongialam shnong ki barim bad ba mynta’, la ong u Ma Dhar.

Ula ong ruh ba ka jingdon jong ka Community Hall kan sa long ka jingkyrkhu kaba khraw ïa ki paidbah ha kaba kin ïoh ban pyndonkam ïaka ha kiba bun ki kam la ka long ban pynlong ki jingïalang bad kiwei de ki bynta bad kyntu ruh ïa ki paidbah nongshong shnong ba kidei ban sumar bha ïaka khnang ba kan lait na ki jingshah pynjot bad kum ki paidbah ki dei ban kheiñ ïaka kum la ka jong ka ïing.

U MDC Ma Jesse Suiam ula kitbok kitrwiang bad aikhublei iaki nongshong shnong kiba la ïa trei shitom bad kyntu ruh ban pyndonkam ïa kane ka jingtei ha ka rukom kaba dei.

U Waheh shnong Ekwin Rynjah ula iathuh ba ia kane ka Community Hall la sdang ban tei naduh u snem 2010 ter ter haduh u snem 2024 haka jinglut kaba kot kumba 53 lak tam tyngka.

Ki jingiarap la ioh lyngba u MP barim ka Shillong Ma Vincent H. Pala ha u snem 2012 kumba Shilak Sanphew hajar tyngka, ha u snem 2023 la ioh na u MLA ka thaiñ Ma Sniawbhalang Dhar 2 lak 50 tyngka ryngkat ka pisa kaba ka shnong ka khlem poi pyrkhat ban ioh kum ka bai lutksan ne compensation lyngba ka jingwan ki Gas pipe line hapoh ka shnong.

Kane ka Community Hall kadei ka jingangnud kaba la slem bah jong ki nongshong shnong na ka bynta ban pynlong iaki jingialang shnong bad kiwei kiwei ki jait ai jinghikai ha kaba iadei bad ki skhim sorkar nalor kiwei ki kam shnong kam, la ong u Waheh shnong.

Hadien ka jingialang u Ma Sniawbhalang Dhar ula plie ia u maw nongrim jong ka Community Hall bad khap ruh ia u ribon kum ka dak ka jingkyntiew kyrdan iaka Upper Primary School, Nongkhroh kaba la seng naduh u snem 1992 sha ka Seccondary School, khnang ban pynsuk iaki longiing jong ka shnong ki bym ioh lad ban pynleit skul iaki khun shabar na ka shnong.

Shwa kane u Secretary Shnong Kyrmen Rynjah ula iathuh iaka Histri lyngkot jong ka Shnong Nongkhroh kaba la seng ha u snem 1929 bad ha katei ka por la don tang 15 tylli ki longiing kiba wan poi rep bad kumba ka long mynta la don kumba 367 tylli ki longiing bad 2052 ngut ki nongshong shnong kynthup shynrang bad kynthei.

Iaka jingialang la pyniaid da ka Kong Albina Nongrum Headmistress UPS bad la ioh ki jingduwai na u tymmenbasan Pharlis Lawai bad Rangbah Baang Adrian Dkhar.

La pynphuh pynphieng iaka jingialang da ki jingrwai jingshad ba la shim bynta da ki longkmie, samla bad khynnah ka shnong iaka jingialang la pynwai da ki kyntien khublei na u Elvin Mynsong Assistant Waheh Shnong.