Hadien ba la pynbna iakhih paidbah ka 6 Shnong; pynbiang ka koit ka khiah ia ka jingdonkam ka PHC Mawryngkneng

Syllad | The Rising MeghalayaJune 2, 2020

Tang shi sngi hadien ba pynbna iakhih paidbah ka 6 Dorbar Shnong; ka tnad ka koit ka khiah jong ka sorkar jylla wut wut kala pynbiang ia ka jingdonkam ka PHC Mawryngkneng.

U Director ka tnad koit ka khiah Dr A War bad u Executive Engineer ka Health Engineering wing kila wan jurip mar mar iaka Mawryngkneng PHC bad la iakren bad ki nongialam shnong ban pynioh ia baroh ki jingdawa ka 6 Dorbar shnong mynta ka sngi.

Ka 6 Dorbar Shnong ki kynthup iaka Mawryngkneng, Puriang, Kut, Thangshalai, Ksehpyndeng bad Pommura. Baroh kine ki shnong ki hapoh ka East Khasi Hills District.

Ka 6 Dorbar Shnong kala pynbna paidbah ban pynlong da ka jingiakhih shong kyllain myngngor hynnin ka sngi, hynrei tang marsien pynbna paidbah ka tnad ka koit ka khiah ka jylla hapoh ka jingialam u Director ka Health Service Department kila wan hiar sha Mawryngkneng PHC.

Ha kane ka jingwan hiar u Dr War, ki Sordar jong kine ki 6 Dorbar Shnong kila ioh ka lad ban iakren bad pynsngew iaka jingeh kaba ki iakynduh haka PHC Mawryngkneng.

Baroh ki jingdawa ka 6 Dorbar Shnong la kular ban pynioh, kata ban thung doktor ban peit nongpang haka por miet synia. Nalor u doktor la kular thung ruh iaki nongtrei ba kynthup iaka ward girl, sweeper.

Kiwei kiwei ki jingpynbeit ban pyniaid beit iaka jingai jingshakri ka PHC Mawryngkneng:

La pynbeit ruh iaka por ai slip ban shim dawai u paidbah naduh ka por 10 AM haduh 12:30 PM.

Ban pynioh dawai dashin ha kane ka PHC.

La pynthikna ba ki doktor bad nurse bad chowkidar kin don beit ha PHC ban iarap iaki nongpang kiba wan thiah haka PHC

Ban issue biang por iaki Birth bad Death Certificate.

Ban shna iaka jaka buh metiap haka PHC.

Ka 108 ka dei ban kit iaki nongpang  ba don kam sumar khlem da donkam ban phone sha Shillong

Ban shna iaka khyrdop ne gate ban lait rung klumar ki briew bad ki pulit kin pynthikna ban pahara bad ban khanglad iaka jingrung klumar ki paidbah hapoh PHC.

Kiwei kiwei ki rai ha kaba iadei bad ka jingiakhun pyrshah iaka khlam COVID-19, la pynbeit ba ki doktor jong ka PHC ki dei ban shimkhia ban ai jingiarap iaka quarantine centre Mawryngkneng lada don ka jingpyntip na ki asha bad anganwadi worker lada jia ba don kam jingsumar ia kiba sah quarantine.

Ban pyntreikam noh iaka building thymmai jong ka PHC hapoh shi bnai bad ban pynbiang ia baroh ki jingdonkam.

Ka tnad ka koit ka khiah kan wan jurip biang iaka PHC Mawryngkneng hapoh 14 sngi haka jingiadonlang ki nongialam shnong jong ki 6 shnong.

Hadien ba u Director jong ka tnad ka koit ka khiah ula kular ban pynbiang ia baroh ki jingdonkam ka PHC Mawryngkneng, ka 6 Dorbar Shnong kala rai ban weng shipor iaka jingiakhih bad lada kam urlong katkum ka jingiakren ka 6 Dorbar Shnong kan iaid beit sha khmat ban iakhih ban pynbor iaka sorkar ban pynbiang iaki jingdonkam ka PHC.