Hadien ka jingdawa kaba la bun snem, plie u Myntri Rangbah ia ka Mawhati C&RD Block

Syllad | The Rising MeghalayaJanuary 25, 2025

U Myntri Rangbah ka Jylla u Conrad K Sangma ha ka 25 tarik Kyllalyngkot u la plie ia ka C&RD Block ha ka prokram ba la pynlong ha ka shnong Umsohlait ha ka jingiadon lang u Myntri ka Tnad C&RD u Abu Taher Mondal, u MLA ka Mawhati u Bah Charles Marngar, u MLA ka Umsning u Dr Celestine Lyngdoh nalor kiwei kiwei.

Haba aijingkren ha ka jingialang plie ia kane ka Block kaba ki paidbah ka thain ki la dawa mynta la buntylli ki snem, u Myntri Rangbah u la ong, “Ka jingplie ia kane ka C&RD Block ka pyni ia ka jingkut jingmut kaba skhem jong ka sorkar ban pynjan ia ka synshar ka khdar sha u paidbah.”

U la ong ki don jan kumba 1 lak ngut ki briew bad ki nongshong shnong hapoh ka Umsning C&RD bad ki briew ki hap ban iaid haduh palat 100 km ban poi sha ka ophis jong ka Block, bad dei na kata ka daw ka sorkar ka sngew ba dei ban wanrah jingkylla. Kumta ruh ka la shim ia kane ka sienjam ban pynthikna ban pynioh ia ka jingshakri kaba jan sha ki paidbah nongshong shnong.

U la ong ruh ba kane ka Block ym tang ba kan iarap ia ki paidbah ka Mawhati hynrei pynmyntoi ruh ia ka Umsning namar kiba bun ki shnong jong ka Umsning ki dei kiba hap hapoh Mawhati block.

“Ka sorkar ka dang trei ban wanrah katto katne ki jingpynkylla ha ki rukom pyniaid kam bad kane kan shim katto katne por. Ngi la iohi ba na ka bynta kiba bun ki jingshakri ba ka sorkar ka la ai ki paidbah ki hap ban leit sha ki Sub Division lane ki District Headquarter. Ngi dang wad ia ki lad ki lynti ban pynioh ia kine ki jingshakri lyngba ki ophis jong ki Block,” u la ong da kaba bynrap ruh ba ia ka mangtyngka jong kane ka ophis Block ha Mawhati yn sa aiti noh kham kloi khnang ba ka Mawhati Block kan lah ban treikam noh kham kloi.

Nalor kata u la pyntip ruh ha ka jingialang halor ki project kam pynroi na ka bynta ka thain ha kaba kawei na ki project ba kongsan ka kynthup ia ka surok Umsning-Mawhati ka ban long shisha ka jingkyrkhu kaba khraw na ka bynta ban kyntiew ia k ioh ka kot bad ia ka jingai jingshakri jong ka sorkar.

U la kyntu ruh ia ki nongshong shnong ba kin iatreilang bad ka sorkar ha ki kam pynroi bad kyntu ruh ia ki ophisar ki ban sa aijingshakri hapoh Mawhati Block ban ai ia ka jingshakri kaba bha tam sha ki paidbah nongshong shnong.

Shwa kane la ioh ruh ka jingkren na u Myntri ka Tnad C&RD Block u Abu Taher Mondal, u MLA ka thain nalor kiwei pat.

Shuh shuh ha kane ka sngi u Myntri Rangbah nalor kiwei pat ki heh kiba la ia don lang ki la sam ruh ia ki M-Tab sha ki samla pule klas XI jong kane ka thain.