Hadien ka jingiakhih shah thngan, ujor ka Kong Bindas Syiem sa ia ka jingbym shimkhia ka Nongpoh Civil Hospital

Syllad | The Rising MeghalayaJune 12, 2024

Hadien ka jingiakhih shah thngan kaba seisoh halor ka jingdawa pynioh ia ka surok kaba bha, ka Kong Bindas Syiem mynta ka la ujor pyrshah sa ia ka jingbym shimkhia jong ki bor ba dei khmih jong ka Civil Hospital, Nongpoh, Ri Bhoi District.

“Ka rukom ai jingshakri ia ki nongpang hapoh Civil Hospital Nongpoh  ka la nanghiar arsut na kawei ka sngi sha kawei pat khamtam ka jingbym shimkhia ki bor ba dei khmih ban pynthikna ban pynioh ia ka jingshakri kaba biang sha ki nongpang,” ong ka Kong Bindas Syiem kaba dei ka nongshong shnong jong ka thain Umden hadien ba ka la wan shah sumar ha kane ka hospital namar ka jingkem tlot.

Lah ban kdew ba ka kong Bindas Syiem hadien ba ka la pynsangeh ia ka jingiakhih da kaba shah thngan khlem pud ha nongbah Shillong mynta la 6 eiei, hadien ba i la wanphai sha la iing i la kem pang noh shiteng lynti ha Umsning bad la pynkit noh sha Civil Hospital Nongpoh ban ioh jingsumar namar ka jingtlot ha ka bor met. Hynrei kum ka nongpang ka la mad pynban ia ka jingbym shimkhia jong ki bor pyniaid ka Civil Hospital Nongpoh ban sumar ia ki nongpang.

Haba kren sha ki lad pathai khubor, ka Kong Bindas Syiem ka la iathuh bamar ia poi ha Nongpoh Civil Hospital, ka la khie tlot bha ha ka bor met bad ha ka shiteng miet ka la donkam kyrkieh ia ki nos ne doktor namar bym iaid bha ka drip bad ka nongap ia i ka la leit khot ia ki nos kiba don ha duty hynrei kim shym la plie satia ia ka jingkhang bad ki khlem wan satia ban peit ia i watla I la khie tlot bha hynrei ki nos ki la wan khmih ia i haduh 6 shiteng eiei mynstep.

Nalor kata i la iathuh ruh ba ym tang ma i iba la mad ia kane ka jingbym shimkhia na ki bor ba dei khmih hynrei don ruh sa kawei ka longkmie ka kong Ibanjalin Marbaniang kaba dei na ka shnong Kyrdem Kulai kaba kham shitom jur bha kaba la donkam bha ia ki doktor bad nos ha ka por shiteng miet, bad watla ki la phah khot ia ki nos ban wan khmih ia i hynrei ym don satia ba wan khmih ne wan ai dawai ia i tad haduh mynstep syndon.

Kumta na ka liang ka Kong Bindas ka buh ka jingkyrpad ia ki bor ba dei khmih ban shim ia ki lad ba tyngeh ia kito kiba don hapdeng jong ka kam bad ki bym shimkhia pat ia la ka kamram ban pyntikna ba ki nongpang kin ioh ia ka jingsumar kaba thikna.

Kane ka longkmie, ka la pynpaw ruh ba ki jingsumar ha kane ka hospital kam long satia kaba ai jinghun ia ki nongpang namar ba ki doktor ne ki nos kim shimkhia ia la ka kamram ba dei ban leh ne pyndep.

Shuh shuh ka la  bynrap ruh ba ki nongtrei jong ki hospital ki dei ban shimkhia ia la ka kamram ba la bynshet ha ki, lem kumta kumno ki nongpang kin ioh ia ka jingsumar kaba hok.Ka Kong Bindas ka la ong ruh ba kan leit phah sumar noh shawei pat ka hospital namar kam hun ne sngew iahap ia ka jingleh jong ki bor ba dei khmih hapoh kane ka hospital sorkar.