Hadien ka jingjia shah pyniap ka longkmie, kyntu ka MIWC iaki trai ïing ban husiar ai iing wai

Syllad | The Rising MeghalayaFebruary 2, 2025

Ka Meghalaya Indeginous Women’s Council (MIWC) kala pynrem jur halor ka jingshah pyniap dusmon kawei ka longkmie kaba tip ka Kong Ngildres Dkhar ba shong basah ha Ladrymbai Dongwah.

Ka President jong ka Meghalaya Indeginous Women’s Council ka Kong Bythygrace Dkhar ha u kyrwoh khubor kala iathuh ba kane ka jingjia kala jia ha 27 tarik Kyllalyngkot bad la ioh jingtip haduh 29 tarik Kyllalyngkot.

Ka Meghalaya Indeginous Women’s Council kala kynnoh ruh ba ia kane ka kam la donkti da u bar jylla ia uba la tip kyrteng u Saidul Alom uba shong wai ha iing jong katei hi ka longkmie.

Halor kane ka jingjia ka Meghalaya Indeginous Women’s Council ka ai khublei ia ka Ladrymbai Police Outpost kaba la trei shitom haduh ban da ioh kem noh ia utei u runar bad ha kajuh ka por ka kyntu iaki bor ka ain ban pynshitom tyngeh ia u da kaba set phatok shi junom.

Ka Kong Bythygrace Dkhar ka kyntu jur iaki trai iing kiba ai wai iing ban husiar ka iing wai khlem da pynthikna iaka jinglong jingman ki briew ban lait na kino kino ki jingjia kiba sngewsih.