Hadien ka jingjop iaka FC Bengaluru rung biang ka Shillong Lajong sha ka I. League

Syllad | The Rising MeghalayaMay 21, 2023

Ka Shillong Lajong Football Club, sa shisien pat ka la lah haka ban rung pat sha ka lympung ialehkai jong ka I. League.

Ka jinglah ban rung biang sa shisien ka Shillong Lajong sha ka I. League ka la wan hadien ka jingiakhun kaba long haka Sngi U Blei ha SSA Stadium, First Ground Polo, kane ka kynhun ka la lah ba kan pynliem noh ia ka FC Bengaluru da 2-1.

Nalor katta ka daw kaba la lah shuh shuh ban pynlong ia ka Lajong ba kan rung biang sha ka I. League ka jia long ba sa kawei pat ka kynhun kaba la tbeh bha ialade sha ka thong ban ioh rung sha ka I. League kata ka Ambernath United ka la shah liem noh hakhmat ka United SC Kolkata, kaba da kylla ka lynti ka la plie pat ia ka Shillong Lajong bad da ka jingjop ia ka Bengaluru kala ioh ba kan khur pura 7 poin bad ban don halor duh ka miej iakhein poin bud pat sa ka Ambernath kaba la lah ban neh ha ka kyrdan kaba ar hadien ba ka la ioh ba kan khur 4 poin.

Haba phai sha ka jingiakhun, ia ki artylli ki kol ba Shillong Lajong FC la thep ia ki da u Everbrightson Mylliempdah ha ka minit kaba 43, hadien kane ka Bengaluru United ka la ioh pat ia ka kabu ksiar ban pynphai kylla ia kane ka shi kol lyngba u Kongbrailatpam Manjit Sharma ha ka minit kaba 51, hadien kane ka Lajong ka la iai ialehkai bha hakhmat u paid nongwan kyrshan uba bun, bad ha ka minit kaba 51 u Figo Syndai ula ioh ban head ia ka bol ha ka minit kaba 82.

Ha kane ka kynti yn don tang artylli ki kynhun ban ioh ban rung sha ka I. League bad ka jingiakhun ia ka round robin final round jong kane ka lympung iakhun kan khreh ban jam noh sha kaba kut ha kane ka sngi Thohdieng jong ka taiew.

Naka bynta kane ka jingiakhun ba hynne ka sngi u Coach ka Lajong u Bobby L Nongbet, u la wanrah ia ki kato katne ki jingkylla ha kane ka kynhun, da kaba pynkylla ia la ka First XI ka jong u hadien ba u la pynrung ia u Figo Syndai, Rajat  Paul ba la shim ia ka bynta kum u nongap kol, u Iohborlang Lyngdoh Lyngkhoi bad Hamedamanbha Wahlang kiba la mihpli ha ka jaka jong u Bishal Lama, Sambor Kharsahnoh, Babysunday Marngar bad Atlanson Kharmaw.

Ban shu kyrtiang dien shaphang ka Lajong ha ka I. League, ka dei ka klob ialehkai ba nyngkong na ka thain shatei lam mihngi ka ri ban ioh ban aireng ha kane ka lympung ha ka samoi ialehkai 2009-2010, ha kaba ka la hiar noh pat, hynrei ka la iai bteng ba kan iakhun tad haduh ba kan da ioh ba kan rung biang sha kane ka lympung ban iai neh kumba phra samoi ialehkai katta naduh u snem 2011-12 ha  shwa ba kan hiar noh pat ha ka samoi ialehkai 2018-19

Image credit: ILeagueOfficial