Hadien ka jingleh bun tylli ki test, lap ba biang u dawai wieh Albendazole, ong ka MMDSL

Syllad | The Rising MeghalayaDecember 8, 2023

Ka Meghalayan Medical Drugs & Services Ltd (MMDSL) ka la pynksan ba u dawai wieh Albendazole Tablet u dei uba la lah ban pyndep ia baroh ki kyndon kiba donkam halor ka jingbha, ka jingtreikam bad na ka bynta ka jingshngain.

Ka MMDSL ha u kyrwoh ba la pyllait paidbah haka sngi Balang ba la lah ka la pynpaw ba ki la don katto katne ki lad pathai khubor ki ba la pynpaw ba une u dawai wieh Albendazole Tablet u dei u bym bha ne substandard.

Ki la pyntip ruh ba hadien ba ki la ioh pdiang hapoh ka State warehouse, ia kine ki dawai Albendazole tablets batch no. MS4AI2301 (Manufacturing Date: Jan-2023, Expiry Date: Dec-2025) la sam sha ki district katkum ki jaka kiba donkam.

Ka jingleh ia ki test halor ka jinglong jong une u dawai la dep ban leh ha u bnai Rymphang 2023, kata kynthup kaba kynthup lyngba ka test report na ka jaka pynmih bad na ka National Accreditation Board for Testing and Calibration Laboratories (NABL), ha baroh baroh ki artylli ki report ki pynthikna ba kine ki dawai ki dei kiba kot ia ka standard jong ka jingbha kumba ka dei ban long.

Hynrei, hadien ba la ioh pdiang ia ka quality report na ka Regional Drug Testing Lab (RDTL), Assam, ha u bnai Risaw 2023, la pynpaw ba kine ki dawai kim long satia kiba bha ne substandrad, kumta ruh mardor la pynmih ia ka hukum ban pynsangeh ban sam ia kine ki dawai kiba dei thik na kane ka batch.

Hadien la leh biang ia ka Comprehensive Quality Reassessment ha u bnai Naiwieng 2023 da ka Quality Control division jong ka  Meghalayan Medical Drugs & Services Limited da kaba shim nuksa na ka jaka buh ne warehouse. Ia ka nuksa ne sample la phah sha ka NABL-accredited lab sha Kolkata, ha kaba ia ka jingpynithuh ia ki nongpynmih bad ia ka batch number la buhrieh kyrpang. Ia u batch number ba la pynmih da ka quality Assurance department ka long MMDSL QC 0022.

Hadien ba la ioh ia ka kaiphot na ka jingleh ia ki test la pynthikna ba kine ki dawai kuli Albendazole tablet jong ka batch no. MS4AI2301 (Manufacturing Date: Jan-2023, Expiry Date: Dec-2025) ki dei kiba biang bad kiba la pyndep ia ki kyndon kiba donkam baroh. Kane ka jingleh ia ki test ka kynthup ha ki artylli ki lab jong ka NABL bad kawei ha ka lab jong ka jaka pynmih.

Baroh kine ki lab ki pynthikna ba une u dawai u dei uba bha, uba treikam bad uba shngain, bad na ka liang ka Meghalaya Medical Drugs & Services Ltd ruh mardor ka la shim ia ki sienjam ban pynshisha halor ka jinglong jong une u dawai khnang ban weng ia ki jingsngewkhia kiba lah ban mih bad ka ban ym ktah ruh ia katei ka batch.