Hadien ka jingthung kba, khwai dohkha, khang ka KSU ia ka leit ka wan ki kali lyngba ka surok NH6 ha East Jaintia Hills

Syllad | The Rising MeghalayaSeptember 25, 2023

Hadien ka jingiakhih da kaba thung kba bad khwai dohkha ha ka surok bah NH-6 kum ka dak ban pynpaw pyrshah ia ka jingleh bym suitniew jong ka National Highway Authority of India (NHAI) ban maramot ia kane ka surok kaba la jot rathai, na ka liang ka Khasi Students’ Union (KSU), EJHD Unit haka sngi Nyngkong ka la pynbna sa da kawei pat ka jingiakhih, kata ban khang iaid kali lyngba kane ka surok.

Na ka liang u ma Streamly N Suchen president KSU EJH Unit uba la kyntu jur ia ki baroh ki nongniah kali ba kin ai ka jingiatreilang halor kane ka bynta da kaba kiar ban iaid lyngba na kane ka surok naduh mynta ka janmiet, kata naduh ka por 7 baje haduh ka por 5 baje mynstep jong ka sngi ba Ar.

U la ong ba kane ka jingkhang iaid kali ha kane ka por ba la buh kan bteng na ka bynta shitaiew kynthih.Nalor kata u la ong ba kane kam dei satia ka jingkhang surok ne ka pakhang shnong, hynrei ka dei tang ka jingkyrpad ia ki nongniah trok bad kiwei pat ki nongniah kali namar ka jingsniew palat pud jong kane ka surok kaba la buh  jingma kaba khraw ia ki mynsiem briew.

Kane ka sienjam ka dei ruh ka sien kaba ar hadien ba ka Khasi Students’ Union (KSU), EJHD Unit kala khot pynlong biang da ka jingiakhih paidbah ban pyrshah jur ia kane ka jingleh kuman jong ka NHAI bad ka sorkar jylla halor ka jingjot rathai jong kane ka surok bah National Highway 6.

Kane ka jingiakhih paidbah ka la sdang da kaba thiah hapdeng ka surok bah ne shong kyllain myngngor ha kaba la sakhi ia ka jingkyrshan ba pura na u paidbah jong ka thain hi baroh kawei. Hadien kane la bteng ia ka jingiakhih da kaba thung kba, khwai dohkha bad kiwei pat ki jingleh tamasa ha kane ka surok bah NH 6 ha Khliehriat, EJHD.

Nalor kata ha kane ka jingiakhih la wan iashim bynta lang da ki hynnah skul kiba la rah ha ryngkat ki plakad kiba don ia ki jingthoh kiba kynthoh pyrshah ia kane ka jingleh jong ka NHAI.