Hadien ka jingujor sha u DC (Supply) EJHD, lap ia ka jingduna thew u khaw ba la ai da ki Govt Wholesaler

Syllad | The Rising MeghalayaAugust 23, 2023

Hadien ba ka ophis u DC Supply ka East Jaintia Hills District ka la phah ia ka tnat ba kan leit thew kilo ia u khaw uba don hapoh Pamrakmai  FPS Centre la lap ia ka jingduna thew jong man la ki byrni khaw ia kaba ki Govt. Wholesaler ki kheiñ ba u don 49 ne 50 kilo hynrei la lap ba ki don ha ka jingthew kaba tang 42,40,39,38, 37 bad 36 kilo shi byrni.

Kane ka la wan long hadien ba ka la mih ka jingeh bad ka jingujor ha kaba iadei bad ka jingioh duna ia u khaw rashon ba la pyllait da ka ophis u DC Supply ka East Jaintia Hills District, kaba la pynlong ia ka Vigilance Committee ba la lamkhmat da u Secretary Vigilance Committee uba dei ruh ha kajuh ka por kum u Secretary Shnong u Ma Wellson RD Siangshai ba kin leit ban pynsngew ia kane ka jingeh sha utei u heh ka district.

Kane ka la wan long hadien ba ki nongsam khaw rashon ka Pamrakmai FPS Centre ba la sam da ka Iahunlang V.O Pamrakmai Village, East Jaintia Hills District ka la pynsngew ia ka jingeh halor ka jingduna kilo palat u khaw ration ba la pyllait da ka Office u DC Supply, EJH ka la don shibun ka jingkhnium bad ka jingkynnoh na ki nongioh khaw ration (Ration Card Holder) ia ki dealer nongsam khaw ha ka Shnong halor ka jingbym biang kilo bad duna ka jingioh khaw.

Ha kane ka jingwan thew kilo ia u khaw rashon kaba la pynlong haka sngi ba Ar, la donlang ka kong EV Pariat S.I Supply Khliehriat, U H. Tyngkan Office Assistant Supply Branch Khliehriat, ka Government Wholesaler ka Kong S Bareh ryngkat ka FPS Dealer bad ki Dkhot ka  Vigilance Committee jong ka Shnong.

Ha ka shibnai ka Wholesaler ka pynpoi kumba 107 byrni u Khaw Ration jong ka Shnong bad hadien ba la thew ia kitei ki 107 Byrni la lap ba ka poi tang 43 quintal 1 kilo bad 845 Grams na ka 53 quintal, 68 Grams ba kane ka FPS Centre baka dei ban ioh ha man la u bnai. Na katei ka jingthew la lap ba ka jingduna kilo u khaw ka long 10 quintal 66 kilo bad 155 grams ne haba khein kyllum kalong palat 1660 kilo tam.

Ka Shnong Pamrakmai ka don 16 Tylli ka Card AAY, 176 tylli ka Card PHH bad 24 tylli ka card Non-NFSA. Te ka jingioh ia u khaw rashon kan long 53 Quintal 68 Grams. Ka jingduna kilo haduh katne ka la ktah mat iong shikatdei eh ia ki FPS Dealer Rashon ban pynbit pynbiang  sha ki nong ioh khaw rashon.

Hadien ba la lap ia kane ka jingshisha baroh na ka liang ka Vigilance Committee jong ka Shnong ka pynpaw ia ka jingsngewnguh ia u DC (Supply) East Jaintia Hills District u ba la kloi ban shimkhia bad sngap ia ka jingpynsngew halor kane ka jingeh ba ka Shnong ka iakynduh bad na ka liang jong u la pynsngew ban leh ia ka ba donkam pyrshah ia ki Government Wholesalers halor kane ka bynta.

Lah ban kdew ba kane ka juh ka jingeh ka jingkynnoh ba ka jingduna kilo u khaw rashon kam dei tang ha kane ka Shnong hynrei ha man la ki FPS Dealer jong ka District bad ha ka Jylla hi baroh kawei.

Kumta na ka Liang ka Vigilance Committee bad ka Dorbar Shnong Pamrakmai EJHD ka kyrpad bad kyntu ia ki bor Sorkar ba dei peit ba kidei ban pynbeit bad tih bniah halor kane khnang ba kan ym ktah ia ki nongioh khaw rashon ha ka Jylla.