Hadien ka North Division rah sa ka South Jowai Division sha Amlarem ong ka JSU

Syllad | The Rising MeghalayaNovember 18, 2020

Ka Jaintia Students’ Union (JSU) War Jaintia Circle ha ka 18 Nov 2020 ka la buh ia ka dorkhat sha u Deputy Chief Minister jong ka Sorkar Meghalaya lyngba ka ophis jong u Deputy Commissioner West Jaintia Hills District ban dawa ban kyntiew kyrdan noh ia ka tnad PWD Sub-Divisional Office kaba don ha Amlarem shaka kyrdan Divisional Office (EE office).

Katkum ka dorkhat ka JSU kala pynpaw ba ka Amlarem Civil Sub-Division kadei kaba suit la shor naduh ka 12th November (Naiwieng) 1976 bad ka peit ruh iaki jaka khappud kaba iasam bad ka ri Bangladesh nalor ka kad khaii bar ri ba heh tam ha Meghalaya kaba don ha Tamabil. Ka JSU kala pynpaw ba ka Amlarem kala dei hok ban ioh iaki ophis sorkar kiba khamheh khnang ba kan don ka jingiajan hapdeng ki briew jongka Sorkar bad ki riew paidbah ka thain naka bynta ka jingiatrei lang ban kyntiew iaka ioh ka kot bad ka roi ka par.

“Kumba long mynta ka ophis u EE ka don ha Jowai kaba ngi tip kum ka PWD South Division, bad kane ka Division ka peit iaki jaka kiba hap hapoh ka Amlarem Civil Sub-Division, bad kane kala pynjynjar ia u paidbah haka leit ka wan naduh ka por bad ka bai lut bai sep. Ngi sngewdei ban dawa na ka sorkar kan pyrkhat khia ban pynioh noh iaka EE Ophis jong katei ka tnad da kaba kyntiew kyrdan iaka ophis Sub Divisional kaba la don ha Amlarem,” la ong u Eddy Kery Pohtam, president JSU War Jaintia Circle.

Ka JSU kala ai nuksa ruh iaka jingpynkynriah iaka PWD North Jowai Division kaba la rah sha Shangpung Sub Division bad la pynkylla kyrteng sha ka Shangpung Division, kumta iaka Amlarem kaba dei ka sub division kaba rim tam ruh dei ban pynioh bad kyntiew iaka Sub Divisional ophis ka PWD.

Ka JSU kala byrthen ban iakih paidbah lada ka sorkar kam leh mardor ban kyntiew kyrdan iaka ophis PWD ha Amlarem.

Ka JSU kala dawa ruh na u MLA uba long U Cabinet Minister hapoh Ka Sorkar MDA ba u dei ban ia kren noh mardor bad ka sorkar ban pyn urlong ia ki jingdawa bad kyntiew kyrdan iaka ophis PWD.